Avstriya hukumati maktablarda tahsil olayotgan 14 yoshgacha bo‘lgan qizlar uchun hijob o‘rashni rasmiy ravishda taqiqlashni rejalashtirmoqda. Bu haqda mamlakatning Yoshlar va oila ishlari bo‘yicha vaziri Klaudiya Plakolm mamlakat matbuot agentligiga bergan intervyusida ma’lum qildi.
Plakolmning aytishicha, bunday taqiq nafaqat diniy nuqtayi nazardan emas, balki bolalarning umumiy farovonligi va huquqlarini himoya qilishga qaratilgan. Uning so‘zlariga ko‘ra, ro‘mol ayniqsa 14 yoshdan kichik qizlar uchun kerak emas va Islomda ham majburiy hisoblanmaydi. Shu bois, rejalashtirilayotgan taqiq faqat diniy sabablarga asoslanmagan holda, bolalarning farovonligi va ta’lim muhitiga qaratilgan.
Qo‘shimcha ravishda, Plakolm ta’kidlaganidek, zarurat tug‘ilganda psixologlar orqali ota-onalar bilan maslahatlashuv ham tashkil etilishi mumkin. Maktablar, shuningdek, bolalar va yoshlar huquqlarini himoya qiluvchi vakolatli organlarni ham jalb etish imkoniga ega bo‘ladi.
Vazir bunday chora-tadbirlarni bolalarni himoya qilish va ularning o‘zini erkin va xavfsiz his qilishini ta’minlash uchun muhim deb hisoblaydi. Hijobini yechmagan yoki taqiq qoidalariga rioya qilmagan qizlarga nisbatan qanday choralar qo‘llanilishi va bu yangi tartib qachondan kuchga kirishi hozircha noma’lum bo‘lib qolmoqda.
Mutasaddilar ta’kidlashicha, bu yangi siyosat maktablardagi ta’lim muhitini muhofaza qilish va o‘smirlar uchun xavfsiz muhit yaratishga qaratilgan birinchi qadam hisoblanadi. Shu tariqa, Avstriya hukumati bolalarning huquqlarini himoya qilish va ularning farovonligini ta’minlashda qat’iy qarashda davom etmoqda.
“Zamin”ni Telegramʻda oʻqing!
