O‘zbekiston Prezidenti Shavkat Mirziyoyev Xitoy Xalq Respublikasida Rossiya Prezidenti Vladimir Putin bilan uchrashadi. Bu haqida Rossiya rahbarining yordamchisi Yuriy Ushakov ma’lum qildi.
Ushakovning so‘zlariga ko‘ra, Rossiya Prezidenti Xitoy rahbari Si Szinpin bilan rasmiy muzokaralarini yakunlaganidan so‘ng bir qator ikki tomonlama uchrashuvlar, jumladan O‘zbekiston Prezidenti Mirziyoyev bilan hamkorlikni rivojlantirish va ikki davlat munosabatlarini kengaytirish masalalari muhokama qilinadigan uchrashuvlar o‘tkazadi.
Ma’lumot uchun, Shavkat Mirziyoyev Xitoy Raisi Si Szinpinning rasmiy taklifiga ko‘ra 30 avgustdan 3 sentyabrgacha ushbu mamlakatda rasmiy tashrif bilan bo‘ladi. Ushbu tashrif davomida Mirziyoyev Tyanszin shahrida o‘tadigan Shanxay Hamkorlik Tashkiloti davlat rahbarlari kengashi va “SHHT plyus” formatidagi sammitda ishtirok etadi.
Tadbirlar kun tartibida ko‘p tomonlama hamkorlikni kengaytirish, tashkilot faoliyatini takomillashtirish va strategik yo‘nalishlarni mustahkamlash masalalari ustuvor ahamiyatga ega. Majlislar yakunida Tyanszin deklaratsiyasi va xavfsizlik, raqamli iqtisodiyot, yashil sanoat, energiya, turizm va boshqa sohalarda amaliy sheriklikni rivojlantirishga qaratilgan qo‘shma hujjatlar va qarorlar qabul qilinishi rejalashtirilgan.
2 sentyabr kuni Pekin shahrida Mirziyoyev Si Szinpin bilan ikki tomonlama muzokaralar olib boradi, shuningdek Xitoy rasmiylari va yirik kompaniyalar rahbarlari bilan uchrashuvlarda ishtirok etadi. Bu uchrashuvlarda O‘zbekiston va Xitoy o‘rtasidagi strategik sheriklik munosabatlarini mustahkamlash va amaliy hamkorlikni kengaytirish masalalari muhokama qilinishi rejalashtirilgan.
Shuningdek, O‘zbekiston Prezidenti 3 sentyabr kuni Ikkinchi jahon urushidagi G‘alabaning 80 yilligiga bag‘ishlangan bayram tadbirlarida ham ishtirok etadi. Xitoy rasmiy axborot agentligi “Sinxua” xabar qilishicha, ushbu tantanalarda 26 mamlakat yetakchi va hukumat rahbarlari ishtirok etadi.
Xitoyga birinchi safari bilan tashrif buyuruvchi davlat rahbarlaridan biri – Shimoliy Koreya yetakchisi Kim Chen In. Shuningdek, bayramlarda Kambodja, Vetnam, Laos, Indoneziya, Malayziya, Mo‘g‘uliston, Pokiston, Nepal, Maldiv orollari, Qozog‘iston, O‘zbekiston, Tojikiston, Qirg‘iziston, Turkmaniston, Belarus, Ozarbayjon, Armaniston, Eron, Kongo Respublikasi, Zimbabve, Serbiya, Slovakiya, Kuba va Myanma davlat va hukumat rahbarlari ham qatnashadi.
Ma’lumot uchun, Xitoyning yapon agressiyasiga qarshi qarshilik ko‘rsatish urushi, ikkinchi Xitoy-yapon urushi deb ham ataladi. Urush 1931 yilda Yaponiyaning Manchuriyaga bosqini bilan boshlanib, 1937 yilda keng ko‘lamli harbiy harakatlarga aylandi va 1945 yilda Yaponiya taslim bo‘lishi bilan yakunlandi. Xitoy bu urushda fashizm ustidan g‘alaba qozonishda, yapon qo‘shinlarini uzoq yillar davomida cheklab turishda va xalqaro antifashistik frontni shakllantirishda muhim rol o‘ynagan.
Bu tashrif O‘zbekistonning xalqaro maydondagi taassurotini mustahkamlaydi va mamlakatning strategik sheriklari bilan munosabatlarini yanada rivojlantirish imkonini beradi.
“Zamin”ni Telegramʻda oʻqing!
