Pokistonning shimoliy hududi yana bir fojiali voqeaga guvoh bo‘ldi. 1 sentyabr kuni ertalab Gilgit-Baltiston viloyatida harbiy vertolyot qulashi oqibatida besh nafar kishi hayotdan ko‘z yumdi. Bu haqida mahalliy nashrlar, jumladan Dawn xabar tarqatdi.
Ma’lumotlarga ko‘ra, hodisa soat 10:00 atrofida Chilas shahri yaqinida yuz bergan. Vertolyot Gilgit-Baltiston hokimiyatiga tegishli bo‘lib, u yangi uchish-qo‘nish yo‘lagiga qo‘nishga uringan paytda texnik muammolar sabab qulagani taxmin qilinmoqda.
Voqea joyiga zudlik bilan politsiya va qutqaruvchilar yetib bordi. Biroq afsuski, bordda bo‘lgan besh nafar harbiy xizmatchi tirik qolmadi. Ular orasida komandir mayor Atif, qo‘mondon mayor Faisal, parvoz muhandisi naib subedar Maqbul, ekipaj rahbari havaldar Jahongir hamda naik Amir bo‘lgani ma’lum qilindi.
Rasmiylar hozirda halokatning aniq sabablarini o‘rganmoqda. Dastlabki taxminlarga ko‘ra, texnik nosozlik asosiy omil bo‘lishi mumkin. Tergov ishlariga harbiy va mahalliy idoralar jalb etilgan.
Gilgit-Baltiston ma’muriyati rasmiysi Fayzulla Farak ham voqea yuzasidan izoh berib, qurbonlar oilalariga hamdardlik bildirdi. Shuningdek, hodisadan keyin vertolyot parvozlari vaqtincha to‘xtatilgani aytiladi.
Shu tariqa, Pokistondagi ushbu fojia mamlakatda xavo xavfsizligi va harbiy texnikaning texnik holati masalalarini yana bir bor kun tartibiga chiqardi. Ekspertlar bunday voqealar xavfsizlik tizimlarini kuchaytirish va zamonaviy parvoz texnologiyalarini joriy etish zarurligini ta’kidlashmoqda.
“Zamin”ni Telegramʻda oʻqing!
