Suriyada uzoq yillik tanaffusdan so‘ng ilk neft eksporti amalga oshirildi. Energetika vazirligi ma’lumoticha, mamlakatning ichki ehtiyojlaridan ortiq qolgan qazilma boyliklar xalqaro bozorga yo‘naltirilgan.
Tartus porti orqali yuborilgan 600 ming barrel xom neft Nissos Christiana tankeriga yuklanib, xalqaro savdo kompaniyasi B Serve Energyga topshirildi. Rasmiylar bu jarayonni Suriya energetika infratuzilmasini sinovdan o‘tkazuvchi muhim bosqich sifatida baholamoqda.
Energetika vazirligi vakili Riyod al-Jubasi ta’kidlashicha, eksport uchun yuborilgan neft mamlakatdagi konlardan qazib olinib, Baniyas va Homs zavodlarida qayta ishlangan. Unga ko‘ra, bu amaliyot Suriyaning ishlab chiqarish salohiyati tiklanayotganidan dalolat beradi.
Suriya neft transport kompaniyasi rahbari Maan Pasha ham eksportning qayta yo‘lga qo‘yilishi uzoq yillik to‘siqlardan keyin sohada muhim burilish bo‘lishi mumkinligini qayd etdi. Uning fikricha, mazkur yuk tashish nafaqat iqtisodiy jihatdan ahamiyatli, balki transport va port infratuzilmasining qay darajada samarali ishlayotganini ko‘rsatib beradi.
Ma’lumot uchun, 2011 yilgacha Suriya kuniga o‘rtacha 380 ming barrel neft sotardi. Biroq fuqarolar urushi va xalqaro sanksiyalar tufayli eksport deyarli butunlay to‘xtab qolgan edi.
Shu bois, bugungi amalga oshirilgan jo‘natma nafaqat iqtisodiy ehtiyojlar, balki butun mamlakat uchun strategik ahamiyatga ega qadam sifatida baholanmoqda.
“Zamin”ni Telegramʻda oʻqing!
