AQSHning Indiana shtatida yashovchi bir ayol omad qo‘llab-quvvatlab, lotereyada deyarli 10 million dollar yutdi. Ortiqcha ta’rifga hojat yo‘q, u 11 yil davomida lotereya chiptalarini xarid qilishni odat qilgan va nihoyat uzoq intizorlikdan keyin baxt unga kulib boqdi. 2025 yil 16 avgust kuni sotib olgan chiptasi omad eshigini ochdi va unga katta boylik taqdim etdi.
Ayolning aytishicha, u bir vaqtlar zavodda ishlagan va shu yerda hamkasblari bilan yaqin munosabatda bo‘lgan. Uning lotereyaga bo‘lgan qiziqishi avvaldan bor edi. Keyinchalik uning to‘rt nafar yaqin hamkasbi unga qo‘shilib, birgalikda chiptalar sotib olishni odat qilishgan. Har safar ular omad kelishiga umid qilib, birga pul tikishgan.
Qizig‘i shundaki, ayol ishdan bo‘shab ketganidan keyin ham sobiq hamkasblari bilan aloqani uzmagan. Eng muhim kun kelganda, ya’ni omadli chipta yutuq keltirganda, u o‘zining sobiq ishdoshlari haqida o‘ylab, katta mablag‘ni ular bilan bo‘lishishga qaror qildi.
U shunday deydi: «Mening kasbdosh do‘stlarim bu puldan qanday foydalanishlarini allaqachon belgilab qo‘yishdi. Oralarida kimdir yangi mashina xarid qilmoqchi, boshqasi uy olish niyatida, yana biri esa pulni omonatga qo‘yib qo‘ymoqchi. Men esa ularning xursandligidan ming bor mamnunman».
“Zamin”ni Telegramʻda oʻqing!
