Germaniya siyosiy maydonida g‘alati va noodatiy holat yuz berdi. Sentyabr oyida bo‘lib o‘tishi rejalashtirilgan mahalliy saylovlar arafasida Shimoliy Reyn-Vestfaliyada yetti nafar nomzod hayotdan ko‘z yumdi. Bu voqea mamlakat jamoatchiligi orasida katta qiziqish uyg‘otdi va ko‘plab savollarga sabab bo‘ldi, deb xabar qildi Euro News.
Ma’lumotlarga ko‘ra, hayotdan ko‘z yumgan nomzodlarning barchasi “Germaniya uchun muqobil” (AfD) partiyasi vakillari bo‘lgan. Shu bois ayrim siyosiy kuzatuvchilar va jurnalistlar ularning o‘limlarini fitna ehtimoli bilan bog‘lashdan tiyilmadi. Ayniqsa, aynan bir partiya a’zolari halok bo‘lgani jamoatchilikda turli gumonlarga yo‘l ochdi.
Biroq mahalliy hokimiyat mutasaddilari bu kabi farazlarni rad etmoqda. Ularning aytishicha, saylovlar oldidan nomzodlarning vafot etishi juda kam holatlarda uchrab tursa-da, tarixda bunday misollar bor. Ammo bu galdagi holatda o‘limlar soni odatdagidan ko‘proq bo‘lgani haqiqat.
Politsiya tomonidan berilgan rasmiy izohga ko‘ra, hozircha to‘rt nafar nomzodning tabiiy sabablarga ko‘ra vafot etgani tasdiqlangan. Qolgan uch holat bo‘yicha esa tergov harakatlari davom etmoqda.
Analitiklarning fikricha, saylov oldidan bunday holatlar siyosiy muhitda turli muammolar va taxminlarga yo‘l ochishi mumkin. Bu esa fuqarolarning ishonchi va saylov jarayonining shaffofligiga ham ta’sir ko‘rsatishi ehtimoldan xoli emas.
Jamoatchilik esa hozircha ikki xil fikrga bo‘lingan: bir tomonda buni oddiy tasodif va hayotiy holat sifatida qabul qilayotganlar bo‘lsa, ikkinchi tarafda esa siyosiy sabablardan gumon qilayotganlar bor. Har holda, voqea Germaniya siyosiy hayotida katta muhokamaga aylandi.
“Zamin”ni Telegramʻda oʻqing!
