Finlyandiya hukumati so‘nggi oylarda Rossiyadan kelgan fuqarolarga nisbatan keskin choralarni amalga oshirmoqda. Ukrainadagi urush boshlangandan keyin bu yerga qochgan ko‘plab rossiyaliklar ommaviy ravishda deportatsiya qilinmoqda, deb xabar berdi “Vot-Tak” nashri.
Rasmiy ma’lumotlarga ko‘ra, joriy yilning yanvaridan sentyabriga qadar 104 nafar rossiyalik mamlakatdan chiqarib yuborilgan. Asosiy sabab sifati ularning boshpana so‘rovlari rad etilgani ko‘rsatilmoqda.
Rossiyalik faol Maksim Aliyevning ta’kidlashicha, ikki yil davomida Finlyandiya hududida boshpana so‘rovi bilan murojaat qilganlar umuman suhbatga chaqirilmagan. Faqat 2024 yilning oxirlaridan boshlab intervyu jarayonlari boshlangan va natijada deyarli 90 foiz arizalar rad etilgan.
Ayrim rossiyaliklar bu qarordan norozi bo‘lib, sudlarga shikoyat kiritgan. Ba’zilari esa yana qaytadan boshpana uchun murojaat qilgan. Biroq Finlyandiya migratsiya xizmati murojaatchilarning asosiy dalili – Rossiyadagi safarbarlikdan qochish holatini yetarli sabab deb topmayapti. Ularga ko‘ra, rasmiy jihatdan Rossiyada safarbarlik yakunlangani bois bu asos haqli emas.
Shu sababli ayrim fuqarolar majburiy ravishda mamlakatdan chiqarib yuborilgan. 2025 yilning sakkiz oyi davomida shunday tarzda 18 kishi deportatsiya qilindi. Ular, odatda, Turkiya yoki Estoniya orqali Finlyandiyani tark etgan. Rossiya bilan to‘g‘ridan to‘g‘ri chegaralar esa yopiq holatda qolmoqda.
Shu bilan birga, boshpana olishga muvaffaq bo‘lganlar ham bor. Ular asosan Rossiya hukumati qarorlaridan ochiqcha norozi bo‘lgan shaxslar yoki siyosiy ta’qibga uchragan sobiq deputatlar ekani aytilmoqda.
Mutaxassislar fikricha, bu vaziyat kelgusida Yevropa mamlakatlari migratsiya siyosatida yanada keskin yo‘nalishlarning yo‘lga qo‘yilishi mumkinligidan darak bermoqda.
“Zamin”ni Telegramʻda oʻqing!
