Boltiqbo‘yi davlatlari AQSHni ularga harbiy yordamni to‘xtatmaslikka ishontirishga harakat qilmoqda. Estoniya tashqi ishlar vaziri Margus Tsaxkna ta’kidlaganidek, AQSHning mintaqaga harbiy yordamni to‘xtatish yoki kamaytirish haqidagi qarorlari Boltiqbo‘yi davlatlari uchun xavotirli holatni yaratmoqda.
«Albatta, biz xavotirdamiz. Lekin biz [AQSH] Kongressi bilan ishlayapmiz va AQSH Boltiqbo‘yi davlatlari mudofaasiga kiritgan har bir dollar Amerika iqtisodiyotiga qaytishini tushuntirmoqdamiz. Biz ham o‘z tomonimizdan 1 dollardan 12 dollargacha hissa qo‘shmoqdamiz», — dedi Margus Tsaxkna Bloomberg agentligiga intervyusida.
Tsaxkna fikricha, AQSHning Boltiqbo‘yi davlatlariga harbiy yordami o‘z navbatida AQSH uchun ham yaxshi kelishuv hisoblanadi. Uning so‘zlariga ko‘ra, harbiy yordamning to‘liq to‘xtatilishi yoki kamaytirilishi AQSHning milliy manfaatlariga zid bo‘lib, iqtisodiy va strategik jihatdan ham keraksiz yo‘qotishlarga olib kelishi mumkin.
Qolaversa, Tsaxkna AQSH va Boltiqbo‘yi davlatlari o‘rtasidagi hamkorlikning muhimligini va mintaqadagi xavfsizlikni saqlashdagi katta rolini alohida ta’kidladi. AQSHning harbiy yordami va strategik ko‘maklari mintaqa mamlakatlari uchun muhofaza va iqtisodiy rivojlanishga zamin yaratadi.
Boltiqbo‘yi davlatlari, jumladan, Estoniya, Latviya va Litva, o‘z hududidagi xavfsizlikni mustahkamlash va NATOning sharqdagi chegaralarini muhofaza qilish maqsadida AQSH bilan hamkorlikni yanada kuchaytirishga intilishmoqda.
“Zamin”ni Telegramʻda oʻqing!
