Turkiyada yuz bergan yo‘l-transport hodisasi yurtdoshlarimizni iztirobga soldi. Ijtimoiy tarmoqlarda tarqalgan ma’lumotlarga ko‘ra, Istanbul shahrida 17 yoshli O‘zbekiston fuqarosi S.S. avtohalokat oqibatida vafot etdi. Mazkur holat yuzasidan O‘zbekistonning Istanbuldagi Bosh konsulxonasi rasmiy munosabat bildirdi.
Ma’lum qilinishicha, yigit joriy yilning 5 aprel kuni sodir bo‘lgan YTHda og‘ir tan jarohatlarini olgan va darhol shifoxonaga yotqizilgan. Bir necha kun davomida shifokorlar uning hayoti uchun kurash olib borishgan bo‘lsa-da, ko‘rsatilgan barcha tibbiy yordamlarga qaramay, afsuski, u 15 aprel kuni vafot etdi. Marhumning jasadi 17 aprel kuni Samarqand viloyatida dafn qilingan.
Holat bo‘yicha qo‘shimcha tafsilotlar ham ma’lum qilindi. Ma’lum bo‘lishicha, YTHni sodir etgan Turkiya fuqarosi hodisa joyidan qochib ketgan, biroq ordan bir kun o‘tib pushaymonlik bildirib, politsiyaga taslim bo‘lgan. Tekshiruvlar vaqtida uning qonida giyohvand moddalar mavjudligi aniqlangan. Shunga qaramay, ayni paytda u qamoqqa olinmagan. Sud jarayoni joriy yilning 2 oktyabr kuniga belgilangan.
Bosh konsulxona ma’lumotiga ko‘ra, marhumning oila a’zolari hodisa sodir bo‘lgan paytda konsullikka murojaat qilmagan. Hozirgi vaqtda diplomatik vakolatxona tomonidan ularga zarur konsullik va huquqiy yordam ko‘rsatilmoqda.
Qizig‘i shundaki, ijtimoiy tarmoqlarda ayni paytda tarqalgan xabarlarda S.S. ni u tug‘ilgan kunida, onasiga gul olib qaytayotganida mashina urib ketgani haqida ham aytiladi. Bu holat yurtdoshlarimiz orasida yanada katta iztirob uyg‘otdi.
Mutaxassislar ta’kidlashicha, mazkur voqea nafaqat yo‘l xavfsizligiga oid muammolarni, balki xorijda yurtovdoshlarimiz hayoti va huquqlarini himoya qilish masalalarini yana bir bor kun tartibiga olib chiqmoqda.
“Zamin”ni Telegramʻda oʻqing!
