Xitoyda sud tarixda kamdan-kam uchraydigan keskin qaror chiqardi. Myanmadagi jinoiy tarmoqlarni nazorat qilib kelgan, Minglar familiyasi bilan tanilgan mashhur mafiya oilasining 11 nafar a’zosi o‘lim jazosiga hukm qilindi. Bu haqda BBC o‘z manbalariga tayanadi.
Ma’lumotlarga ko‘ra, Ming oilasi uzoq yillar davomida Myanmaning Laukkay shahridagi qimorxona, giyohvandlik va firibgarlik markazlarini boshqarib kelgan. Ular nazorat qilgan tarmoq orqali milliardlab dollar aylanib, butun mintaqada katta xavfli qudrat shakllangan.
Biroq ikki yil avval isyonchi guruhlar shaharni egallab olgach, oila boshlig‘i o‘z joniga qasd qilgan. Shu voqeadan so‘ng, mafiya a’zolarining ko‘pchiligi Myanma hukumati tomonidan Xitoyga topshirilgan.
Venjou shahrida 29 sentyabr kuni bo‘lib o‘tgan sud jarayonida barcha aybdorlarga hukm o‘qildi. Jami 39 kishi turli jazolar olgan: 11 kishi qatl etish, 5 kishi kechiktirilgan o‘lim, 11 kishi umrbod qamoq, qolganlari esa 5 yildan 24 yilgacha ozodlikdan mahrum qilindi.
Sud hujjatlarida keltirilishicha, Ming oilasi 2015 yildan beri turli turdagi jinoyatlar bilan shug‘ullanib kelgan. Ular qurgan qimorxonalarda va firibgarlik markazlarida ishchilarga nisbatan shafqatsizlik qo‘llanilgan, hatto ba’zilari qiynoq ostida halok bo‘lgan.
Mutaxassislar ta’kidlaydi: bunday tarmoqlar xalqaro tashkilotlar, xususan BMT tomonidan "qalloblik industriyasi" sifatida baholanadi. Unda ko‘plab odamlar aldov yo‘li bilan tuzoqqa ilinadi va noqonuniy ishlarga majbur etiladi.
Shu bilan, Xitoy sudi chiqargan hukm nafaqat jinoyatchilarga nisbatan keskin chora sifatida, balki xalqaro hamjamiyat uchun ham signal sifatida qabul qilinmoqda — katta jinoyatlar jazosiz qolmasligi kerak.
“Zamin”ni Telegramʻda oʻqing!
