Turkiyada 12 yoshli o‘zbekistonlik bola onasi va o‘gay otasi bilan kelishmovchilik sabab uyidan qochib ketdi, deb xabar berdi “Istanbul.uz” manbasi. Bolaning holatidan keyin politsiya va O‘zbekistonning Istanbuldagi Bosh konsulxonasi aralashdi.
Ma’lumotlarga ko‘ra, bola mahalliy politsiyaga murojaat qilib, uyidagi qiyinchiliklar va bosimlar haqida gapirgan. Shu orqali uning taqdiriga hokimiyat va diplomatik idoralar aralashgan. Bolaning onasi avval O‘zbekistonda turmush qurgan, biroq ajrashganidan keyin Turkiyaga ko‘chib kelib, turk fuqarosi bilan imom nikoh asosida oila qurgan.
Dastlab u bolasini O‘zbekistonda buvisi qaramog‘iga qoldirgan, lekin 2024 yil iyun oyida uni Istanbulga olib kelgan. Biroq hujjatlar rasmiylashtirilmagani uchun bola mahalliy maktabga qabul qilinmagan. Shu bois u qariyb bir yildan ortiq vaqt davomida ta’limdan uzoqda bo‘lgan.
Hodisa fosh bo‘lgach, politsiya bolani topib, O‘zbekistonning Istanbuldagi Bosh konsulxonasiga topshirdi. Bolaning holati tekshirildi, u tibbiy ko‘rikdan o‘tkazilib, homiylar ko‘magida zarur yordam oldi.
Konsulxona bolaning xavfsizligini ta’minlab, tegishli hujjatlarni rasmiylashtirgan holda uni vatanga qaytardi. Hozirgi vaqtda u O‘zbekistonda tegishli muassasalar yordami bilan o‘qishini qayta davom ettirmoqda.
Bu voqea xorijda yashayotgan yurtdoshlarimiz uchun yana bir ogohlik bo‘ldi. Mutaxassislar ta’kidlashicha, bolalarning ruhiy va ijtimoiy holatiga e’tiborsizlik ularning taqdiriga jiddiy ta’sir ko‘rsatishi mumkin. Ota-onalardan har qanday sharoitda ham farzandlari manfaatini birinchi o‘ringa qo‘yish talab etiladi.
“Zamin”ni Telegramʻda oʻqing!
