Turkiya prezidenti Rajab Toyyib Erdo‘g‘an mamlakatda millati turk bo‘lgan xorijliklarni ishga qabul qilish jarayonlarini soddalashtiruvchi yangi farmonni imzoladi. Hujjat 10 oktabr kuni rasmiy e’lon qilindi va u ko‘plab xorijdagi turk diasporasi vakillari uchun yangi imkoniyat eshigini ochdi.
Yangi tartibga ko‘ra, millati turk bo‘lgan, ammo boshqa davlat fuqaroligiga ega shaxslar Turkiyada murakkab byurokratik jarayonlarsiz ishlash huquqiga ega bo‘ladi. Ular davlat va xususiy sektorda tadbirkorlik yoki kasbiy faoliyat bilan shug‘ullanishi mumkin. Biroq harbiy xizmat va xavfsizlik idoralarida faoliyat yuritish ular uchun taqiqlangan bo‘lib qoladi.
Farmonda ta’kidlanishicha, bu shaxslar Turkiya fuqarolari kabi kasbiy uyushmalarda ro‘yxatdan o‘tishi shart bo‘ladi. Ammo ulardan Turkiya fuqaroligini talab qilish bekor qilingan — endi yashash va ishlash uchun fuqarolik olish majburiyati yo‘q.
Shu bilan birga, yangi qonun ularga siyosiy huquqlar, ya’ni saylovlarda ishtirok etish yoki nomzod bo‘lish imkoniyatini taqdim etmaydi.
Mutasaddilar ta’kidlashicha, bu qarorning asosiy maqsadi — turk ildizlariga ega bo‘lgan mutaxassislarni mamlakat iqtisodiyotiga jalb etish va Turkiya bilan ular o‘rtasidagi ma’naviy hamkorlikni mustahkamlashdir.
Ekspertlar fikricha, mazkur farmon xorijdagi turk diasporasi uchun yangi imkoniyat yaratib, Turkiya mehnat bozorida malakali kadrlar yetishmasligini qisman bartaraf etishga xizmat qiladi.
Shunday qilib, yangi tashabbus Turkiyaning global maydonda turk millatdoshlarga nisbatan ochiq siyosat yuritishini va ularni mamlakat rivojiga jalb etish niyatini yaqqol ko‘rsatmoqda.
“Zamin”ni Telegramʻda oʻqing!
