Qoraqalpog‘iston milliy taomlari orasida alohida o‘rin tutadigan “Baliq qarma” endi rasman patentdan o‘tdi. Adliya vazirligining ma’lum qilishicha, mazkur taom geografik ko‘rsatkich sifatida davlat ro‘yxatiga kiritildi.
Bu qaror bilan “Baliq qarma” nomi va uning an’anaviy tayyorlanish usuli huquqiy jihatdan himoyalanadi. Shu bilan birga, sifat standartlari mustahkamlanib, Qoraqalpog‘istonning gastronomik brendini kengroq targ‘ib etish imkoni yaratiladi.
Mazkur taom Orol dengizi va Amudaryo deltasiga yaqin hududlarda shakllangan qadimiy baliqchilik an’analariga asoslangan. Uning tayyorlanish uslubi ham o‘ziga xos: pishirilgan baliq, sho‘rva, mayda to‘g‘ralgan sabzavotlar va 1×1 yoki 2×2 santimetrli quritilgan xamir bo‘laklaridan iborat. Taomning yuzasidan olingan yog‘ piyoz ustiga quyilib, o‘ziga xos ta’m va hid beradi.
Mutahassislar ta’kidlashicha, geografik ko‘rsatkich — bu mahsulotning ma’lum hudud bilan bog‘liqligini, uning sifati va mashhurligini ifoda etuvchi intellektual mulk turi hisoblanadi.
Shu tariqa, “Baliq qarma” nafaqat milliy taom sifatida, balki Qoraqalpog‘istonning madaniy va gastronomik merosini namoyon etuvchi brendga aylandi.
“Zamin”ni Telegramʻda oʻqing!
