18 oktyabr kuni Avstraliyaning cho‘l hududida osmondan yonib tushgan sirli jism katta muhokamaga sabab bo‘ldi. “Unilad” nashri yozishicha, mahalliy aholi kuchli portlash ovozini eshitgan va qum ustidan yong‘in chog‘ida paydo bo‘lgan yorug‘likni ko‘rgan.
Hodisa joyiga politsiya va favqulodda vaziyatlar xizmati yetib borgan. Ular obyektni o‘rganish ishlarini boshlagan va aholini xavfsizlik choralariga rioya etishga chaqirgan. Hozircha jismning kelib chiqishi aniq emas, ammo u atrofdagilar uchun xavf tug‘dirmagani ma’lum qilindi.
Avstraliya Transport xavfsizligi byurosi bu jism tijorat aviatsiyasiga tegishli emasligini ma’lum qildi. Ilk tahlillarga ko‘ra, u uglerod tolasidan yasalgan bo‘lib, raketaning yoki sun’iy yo‘ldoshning yuqori bosimli idish qismiga o‘xshaydi. Mutahassislar buni “aerokosmik kelib chiqish elementlariga xos” deb baholamoqda.
Ijtimoiy tarmoqlarda tarqalgan fotosuratlarda qizil qum ustida kupol shaklidagi, yong‘indan keyin qisman kuygan metall tuzilma ko‘rinadi. Guvohlarning aytishicha, jism qulaganidan so‘ng kuchli issiq nur tarqatgan va bir necha daqiqa ichida deyarli yonib ketgan.
Politsiya ma’lumotiga ko‘ra, obyektda kosmik chiqindilarga xos izlar topilgan. Hozirda Avstraliya kosmik agentligi, o‘t o‘chirish xizmati va favqulodda vaziyatlar bo‘limi mutaxassislari birgalikda tergov ishlarini olib bormoqda.
Mutaxassislar bu voqea yer orbitasidan chiqindilarning nazoratsiz tushishi bilan bog‘liq bo‘lishi mumkinligini istisno qilmayapti. Ayrim tahlilchilar esa bu obyekt yangi kosmik dasturlarning sinov elementlaridan biri bo‘lishi ehtimolini ham aytishmoqda.
Hozircha hukumat rasmiylari jamoatchilikka tinchlik saqlashni va hodisaning aniq sabablari haqidagi ma’lumotlar yaqin kunlarda e’lon qilinishi kutilayotganini ma’lum qilgan.
“Zamin”ni Telegramʻda oʻqing!
