Fransiyada parranda grippi bilan bog‘liq vaziyat yana keskinlashdi. Mamlakat qishloq xo‘jaligi vazirligi butun mamlakat bo‘ylab yuqori ogohlantirish darajasini e’lon qildi. Endi barcha parrandachilik xo‘jaliklari hayvonlarni ochiq havoda emas, faqat yopiq binolarda saqlashi shart bo‘ladi.
Bu chora virus tarqalishining oldini olish va sanitariya nazoratini kuchaytirish maqsadida qabul qilindi. So‘nggi yillarda yuqori patogenli parranda grippi Yevropadan tortib Amerikagacha keng yoyilmoqda. Virus yovvoyi qushlar bilan birga norka va mushuk kabi sutemizuvchilarda ham aniqlangan.
Mutahassislar virusning odamdan odamga yuqish darajasigacha mutatsiyalanishidan xavotirda. Hozircha bu turdagi holatlar qayd etilmagan. Yevropa kasalliklar profilaktikasi markazi odamlar uchun xavf darajasi hozircha juda past ekanini ma’lum qildi.
Oxirgi ikki yilda Yevropada virusni cheklash uchun millionlab qushlar yo‘q qilingan. Masalan, Niderlandiyada o‘tgan hafta parranda grippi aniqlangan fermadan 71 ming qush yo‘q qilindi, Ispaniyada esa bir necha ehtimoliy o‘choqlar bo‘yicha tezkor choralar ko‘rilmoqda.
Fransiya hukumati 2022 yilda boshlangan qush grippiga qarshi emlash dasturi samara berganini qayd etdi. Biroq mutaxassislar hushyorlikni yo‘qotmaslik va virusni nazoratda ushlab turish zarurligini ta’kidlamoqda.
“Zamin”ni Telegramʻda oʻqing!
