AQSH Prezidenti Donald Tramp 26 oktyabr kuni Malayziya poytaxti Kuala-Lumpurga yetib keldi. Uni aeroportda qizil gilam va milliy raqs bilan kutib olishdi, deb xabar berdi mahalliy OAV.
Air Force One samolyoti qo‘ngach, Prezidentni Amerika va Malayziya bayroqlarini ko‘targan mezbonlar qarshi oldi. Tramp samolyot trapidan tushib, Malayziya Bosh vaziri Anvar Ibrohim bilan iliq salomlashdi va faxriy qoravul safidan o‘tdi.
Shu vaqtda milliy musiqa yangradi, sahnaga an’anaviy kiyimdagi raqqosalar chiqish qildi. Tramp qo‘llarini ko‘tarib, musiqa sadolariga hamohang ravishda belini tebratdi – bu qisqa, ammo kutilmagan lahza yig‘ilganlar orasida katta qiziqish uyg‘otdi.
Prezident tabassum bilan tomoshabinlarga qo‘l silkidi, Amerika va Malayziya bayroqlarini ushlab suratga tushdi va so‘ng kortejiga yo‘naldi.
Ma’lumotlarga ko‘ra, Tramp Osiyoda bo‘lib o‘tadigan ikki mintaqaviy sammitda ishtirok etib, Xitoy rahbari Si Szinpin hamda boshqa yetakchilar bilan uchrashuvlar o‘tkazishi kutilmoqda. U muzokaralar orqali ikki mamlakat o‘rtasidagi savdo munosabatlarini barqarorlashtirishni umid qilmoqda.
“Zamin”ni Telegramʻda oʻqing!
