Tojikistonning Ismoil Somoniy tizmasida joylashgan yirik muzlikning bir qismi asosiy qatlamdan ajralib tushdi.
Ma’lumotlarga ko‘ra, hodisa 25 oktyabr kuni soat 11:00 larda Tojikobod tumanidagi Saftab qishlog‘i yaqinida sodir bo‘lgan. Ajralgan muzlikning uzunligi taxminan 2 kilometr, balandligi 25 metr, kengligi esa 150–200 metrni tashkil etgan.
Favqulodda vaziyatlar xizmati ma’lumoticha, muzlikning siljishi aholiga yoki infratuzilmaga zarar yetkazmagan. Hodisa oqibatlarsiz yakunlangan.
Mutaxassislar bu jarayonni iqlim o‘zgarishi va havo haroratining barqaror o‘sishi bilan bog‘lashmoqda. Ilgari bunday muz ko‘chkilari asosan Himolay tog‘larida — Hindiston va Nepalda kuzatilgan bo‘lsa, so‘nggi yillarda Markaziy Osiyoda ham shunday holatlar tez-tez ro‘y bermoqda.
Glyatsiologlar ogohlantirishicha, agar yaqin kunlarda kuchli yomg‘ir yog‘sa, muzlikning yana bir qismi ajralib ketishi mumkin. Bu esa Qasa-i-Nabi qishlog‘i yaqinidagi Gulrez jamoatidagi ayrim fermer xo‘jaliklariga xavf solishi ehtimoldan xoli emas.
Taxminlarga ko‘ra, agar muzlik to‘liq erib ketsa, taxminan 7–8 million kub metr suv hosil bo‘ladi. Biroq olimlar bu jarayonning keskin suv toshqiniga aylanishi kutilmayotganini ta’kidlamoqda.
“Zamin”ni Telegramʻda oʻqing!
