Nyu-York tarixida ilk bor musulmon mer saylandi, deb xabar berdi Associated Press.
Demokratlar partiyasi nomzodi Zohran Mamdani AQSH prezidenti qo‘llab-quvvatlagan mustaqil raqibi Endryu Kuomo ustidan ishonchli g‘alabaga erishdi. 34 yoshli siyosatchi nafaqat shaharning eng yosh rahbari, balki uning tarixidagi ilk musulmon mer sifatida qayd etildi.
Saylovoldi kampaniyasi davomida Mamdani uy-joy ijarasi narxlarini nazorat qilish, avtobuslarda bepul yo‘lov haqi joriy etish va bolalar parvarishi xizmatlarini ommabop qilishni va’da etgan edi.
Biroq uning g‘alabasi barchaga yoqmadi. Donald Tramp saylovlar oldidan agar Mamdani g‘alaba qozonsa, Nyu-Yorkni federal mablag‘dan mahrum qilish bilan tahdid qildi. U o‘z tarafdorlarini mustaqil nomzod Kuomoga ovoz berishga chaqirdi.
Ovoz berish 4 noyabr kuni bo‘lib o‘tdi. Mamdani Kuomo hamda Respublika partiyasidan nomzod Kyortis Slivani ortda qoldirdi. U o‘z chiqishlaridan birida Tramp va Kuomoning yaqin siyosiy qarashlarini tanqid qilib, shunday degan:
“Trampning Kuomoni qo‘llab-quvvatlashi ularning bir xil homiylar va bir xil tor dunyoqarashga egaligini ko‘rsatadi. Ular uchun javobgarlik degan tushuncha yo‘q”, — dedi Mamdani.
Ma’lumot uchun, Nyu-York har yili taxminan 7,4 milliard dollar federal mablag‘ oladi, bu shahar budjeti miqdorining 6,4 foizini tashkil etadi. Tramp esa prezidentlik davrida bir necha bor siyosiy sabablarga ko‘ra moliyalashtirishni to‘xtatish bilan tahdid qilgan edi.
“Zamin”ni Telegramʻda oʻqing!
