Birlashgan Millatlar Tashkiloti hisob-kitobiga ko‘ra, insoniyat har yili 1 milliard tonnadan ortiq yegulikni isrof qilmoqda. Bu nafaqat oziq-ovqat xavfsizligiga, balki sayyoramizga ham jiddiy bosim bermoqda — issiqxona gazlari chiqindilarining qariyb 10 foizi aynan shu isroflar hissasiga to‘g‘ri keladi.
Braziliyaning Belem shahrida o‘tayotgan iqlim sammitida mutaxassislar ushbu muammo insoniyat uchun strategik xavf ekanini yana bir bor ta’kidlashdi. Ularga ko‘ra, oziq-ovqat chiqindisiga qarshi kurashish ekologik adolatni mustahkamlash va kelajak avlodlar xavfsizligini ta’minlashning muhim qismi hisoblanadi.
Shu munosabat bilan UNEP va bir qator xalqaro sheriklar “Oziq-ovqat yo‘qotishlarida yutuq” tashabbusini ishga tushirdi. Loyihaning asosiy maqsadi — 2030 yilga borib dunyodagi yeguliklar isrofini ikki baravar qisqartirish, metan chiqindilarini kamaytirish va ochlik xavfini pasaytirish.
UNEP rahbari Inger Andersenning ta’kidlashicha, oziq-ovqatni tejash — ham boy, ham kambag‘al mamlakatlar uchun teng dolzarb vazifa. Chunki yegulikni asrash ochlikka qarshi kurashda ham, atmosferaga zararli gazlarni kamaytirishda ham hal qiluvchi omil hisoblanadi.
Global ekologik jamg‘arma qo‘llab-quvvatlayotgan yangi dastur mamlakatlar va shaharlarga isrofni kamaytirish bo‘yicha samarali strategiyalar yaratishda yordam beradi. Shuningdek, rivojlanayotgan davlatlarda sinovdan o‘tgan yechimlarni moslashtirish va kengaytirishga ham xizmat qiladi.
Mutaxassislar fikricha, oziq-ovqatni asrash — faqat iqtisodiy emas, balki insoniy mas’uliyat hamdir. Chunki har isrof qilingan qism — issiqqa aylangan sayyora, oshib borayotgan chiqindilar va ko‘payib borayotgan ochlik demakdir.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
