Qirg‘izistonning Talas viloyatida yuz bergan qayg‘uli hodisa ko‘pchilikning e’tiborini tortib, ota-onalar uchun yana bir bor ogohlik qo‘ng‘irog‘iga aylandi. Viloyat ichki ishlar boshqarmasi xabar berishicha, 2010 yilda tug‘ilgan 14 yoshli qiz hammomda halok bo‘lgan.
Ma’lum qilinishicha, fojea 7 dekabr kuni Boqay-Ota tumanida joylashgan Qizil-Say qishlog‘ida sodir bo‘lgan. Marhum qiz amakisining uyidagi hammomdan hushsiz holda topilgan. Hodisa yuz bergan vaqtda u yakka o‘zi bo‘lgani ma’lum qilinmoqda.
Tibbiy ma’lumotlarga ko‘ra, voyaga yetmagan qiz tibbiyot muassasasiga yetkazilgan vaqtda hayot alomatlari kuzatilmagan. Dastlabki tibbiy tekshiruvlar uning o‘limiga is gazidan zaharlanish sabab bo‘lganini ko‘rsatib berdi. Mutaxassislar ta’kidlashicha, is gazi beettiborlik yoki texnik nosozliklar tufayli hosil bo‘lishi mumkin.
Voqea yuzasidan Boqay-Ota tuman IIBga rasmiy xabar tushgan va huquq-tartibot idoralari tomonidan surishtiruv ishlari boshlab yuborilgan. Tergovchilar hodisa holatlarini, is gazi qay tarzda yuzaga kelganini va binoda havo aylanishining qay darajada bo‘lganini o‘rganmoqda.
Mutaxassislar ota-onalar va aholini yana bir bor xavfsizlik choralariga qat’iy rioya qilishga, is gazi xavfini jiddiy qabul qilishga chaqirmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
