24 dekabr, chorshanba kuni Rossiya qo‘shinlari Zaporijjya shahriga qarshi havodan yirik hujum uyushtirdi. Zarbalar aviabombalar va uchuvchisiz uchish apparatlari orqali amalga oshirilgan. Bu haqda shahar ma’muriyati rahbari Ivan Fedorov o‘zining Telegram sahifasida ma’lum qildi.
Uning so‘zlariga ko‘ra, hujum oqibatida turar joy binolari jiddiy zarar ko‘rgan, tinch aholi orasida yaralanganlar bor. Rasmiylar tomonidan e’lon qilingan lavhalarda yongan avtomobillar, parchalangan oyna-eshiklar va ko‘p qavatli uylarning vayron bo‘lgan balkonlari aks etgan.
Fedorovning aniqlashicha, kamida to‘rt nafar fuqaro turli darajada tan jarohati olgan. Shuningdek, 13 ta ko‘p qavatli turar joy binosiga zarar yetgan. Keyinchalik ma’lum bo‘lishicha, Zaporijjya viloyati hududidagi navbatdagi hujum natijasida yana bir kishi halok bo‘lgan.
Viloyat politsiyasi hujum tafsilotlariga oydinlik kiritar ekan, shaharga rejalashtirish va korreksiya moduliga ega bo‘lgan uchta fugas aviabomba tashlanganini ma’lum qildi. Bu turdagi qurollar aniq nishonlarga mo‘ljallab zarba berish imkoniyati bilan ajralib turadi.
Ukraina Qurolli kuchlari Havo kuchlari ma’lumotlariga ko‘ra, 24 dekabrga o‘tar kechasi Rossiya armiyasi butun Ukraina bo‘ylab jami 116 ta dron uchirgan. Ulardan 60 tasi havo mudofaasi tomonidan yo‘q qilingan yoki o‘z yo‘nalishidan chiqarilgan. Biroq 48 ta uchuvchisiz apparat nishonlarga yetib borib, turli hududlarda zarar yetkazgan.
Zaporijjyaga qilingan bu navbatdagi hujum urush sharoitida tinch aholi uchun xavf saqlanib qolayotganini yana bir bor ko‘rsatdi. Mahalliy hokimiyat va qutqaruv xizmatlari vayronalarni bartaraf etish va jabrlanganlarga yordam ko‘rsatish ishlarini davom ettirmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
