Qirg‘iziston prezidenti Sadir Japarov tergov izolyatorlari haqidagi shikoyatlarga munosabat bildirib, SIZO dam oladigan yoki qulay yashashga mo‘ljallangan joy emasligini ochiq aytdi. Davlat rahbari bu borada prinsipial pozitsiyasini bildirib, tergov izolyatori avvalo qonun doirasidagi jazo va tartib makoni ekanini ta’kidladi.
Prezidentning so‘zlariga ko‘ra, SIZOlarda sharoitlar ustidan arzlar kelib tushayotgani unga ma’lum. Ammo u bunday muassasalarni «kurort» bilan qiyoslash mutlaqo noto‘g‘ri ekanini qayd etdi. «Tergov izolyatori — kurort emas. Agar u shunday bo‘lganida, uni tergov izolyatori deb atamasdik», — dedi Japarov.
Uning ta’kidlashicha, SIZOlarda isitish pechlaridan foydalanish taqiqlangan, biroq binolar davlat byudjeti hisobidan to‘liq isitiladi va elektr energiyasi bilan ta’minlanadi. Barcha xarajatlar soliq to‘lovchilar mablag‘lari hisobiga qoplanadi, shu sababli ortiqcha talablar qo‘yish o‘rinsiz, deb hisoblaydi prezident.
Sadir Japarov o‘z shaxsiy tajribasini ham eslab o‘tdi. U ikki marta tergov izolyatorida bo‘lgan: birinchi safar 9 oy, ikkinchi marta esa 3,5 yil davomida. «Men shikoyat qilmadim. Chidamli bo‘ldim, chunki bu SIZO edi», — deya o‘tmishini yodga oldi u.
Prezidentning aytishicha, oxirgi yillarda Qirg‘izistonda penitensiar tizim sezilarli darajada isloh qilingan. Ilgari qamoqdagi odamlar ruhan va jismonan yemirilgan bo‘lsa, hozirgi sharoitlar ularning tuzalishiga xizmat qilmoqda.
Bugungi kunda mahkumlarga kuniga uch mahal bepul ovqat beriladi, kiyim-bosh bilan to‘liq ta’minlanadi, qishki va yozgi forma bir xil tartibda taqdim etiladi. Shuningdek, ular mehnat qilib, pul ishlab topish imkoniyatiga ega, ayrim mahkumlar esa o‘z oilalariga mablag‘ ham jo‘natmoqda.
Davlat rahbari so‘zining yakunida qamoqxonalardagi tartib va sharoit barcha mahkumlar uchun bir xil ekanini, hech kimga alohida imtiyoz berilmasligini qat’iy ta’kidladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
