2026 yil 1 yanvardan Mustaqil Davlatlar Hamdo‘stligida (MDH) raislik Tojikistondan Turkmanistonga o‘tdi. Yil davomida Ashxobod hamdo‘stlik doirasidagi ishlarni muvofiqlashtirib, ishtirokchi davlatlar hamkorligining asosiy ustuvor yo‘nalishlarini belgilaydi. Bu haqda podrobno.uz xabar beradi.
Avvalroq Turkmaniston prezidenti Serdar Berdimuhamedov raislik davrida MDH salohiyatini to‘liq ro‘yobga chiqarishga hissa qo‘shish va ko‘p tomonlama hamkorlikka qo‘shimcha sur’at berish niyati borligini bildirgan.
Kutilishicha, 2026 yilda Turkmaniston siyosiy muloqotni rivojlantirish, iqtisodiy aloqalarni kengaytirish, gumanitar hamkorlikni mustahkamlash, shuningdek mintaqaviy barqarorlik va xavfsizlik masalalariga alohida e’tibor qaratadi.
Ustuvor vazifalar qatorida MDH doirasida kelishilgan tashabbuslarni qo‘llab-quvvatlash, jumladan terrorizmga qarshi dasturlar, chegara xavfsizligini kuchaytirish hamda energiya ta’minoti barqarorligini oshirish borasidagi hamkorlik ham bor.
Yilning muhim tadbirlaridan biri sifatida MDH davlat rahbarlari sammitini o‘tkazish rejalashtirilgan. U Milliy turizm zonasi — Avazoda tashkil etilishi ko‘zda tutilmoqda.
Shuningdek, Turkmaniston “MDH Plyus” platformasi doirasida hamdo‘stlikdan tashqaridagi hamkorlar bilan aloqalarni kengaytirish yo‘nalishidagi ishlarni davom ettiradi.
Raislik Ashxobodga mintaqaviy maydondagi diplomatik pozitsiyalarini kuchaytirish uchun qo‘shimcha imkoniyatlar yaratadi. Neytral davlat maqomi Turkmanistonga postsovet hududida vositachi va barqarorlashtiruvchi omil sifatidagi rolini yanada ta’kidlashga xizmat qilishi mumkin.
Umuman olganda, Turkmanistonning 2026 yildagi MDHga raisligi bir tomondan hamdo‘stlikni rivojlantirish mas’uliyatini, ikkinchi tomondan esa mintaqaviy kun tartibini shakllantirishdagi ta’sirini oshirish imkonini anglatadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
