Yangi tartibga ko‘ra, bunday mahsulotlar televideniyeda soat 21:00 dan oldin reklama qilinmaydi. Internet platformalarida esa ularni targ‘ib qilish umuman taqiqlandi. Hukumat rasmiylarining ta’kidlashicha, bu chora “ota-onalarga tarixdagi eng sog‘lom bolalar avlodini tarbiyalashda yordam berish” maqsadini ko‘zlaydi.
Cheklovlar shakar, tuz va yog‘ miqdori yuqori bo‘lgan 13 toifadagi mahsulotlarga taalluqli. Ular orasida shakarli ichimliklar, chips va tuzlangan gazaklar, pechene va tayyor nonushtalar, popkorn, shokolad, saqich, muzqaymoq, shakarli pishiriqlar, pitssa hamda muzlatilgan taomlar bor.
Shu bilan birga, “zararli ovqat” ishlab chiqaruvchilarga bolalar ko‘radigan vaqtda o‘z brendlarini reklama qilishga ruxsat qoldirilgan. Biroq reklamada bevosita ushbu mahsulotlarni ko‘rsatish qat’iyan man etiladi. Ko‘plab kompaniyalar yangi talablarga moslashishni allaqachon boshlagan.
Rasmiy statistikaga ko‘ra, Buyuk Britaniyada boshlang‘ich maktabga qabul qilinayotgan bolalarning 22 foizdan ortig‘i ortiqcha vaznga ega. Maktabni tugatish paytiga kelib esa bu ko‘rsatkich qariyb 36 foizga yetadi. Shuningdek, 5–9 yoshli bolalarda shifokorga murojaat qilishning eng asosiy sabablaridan biri tish kariyesi hisoblanadi.
Mutaxassislar reklama bolalarning ovqat tanlovi va ovqatlanish odatlariga bevosita ta’sir ko‘rsatishini ta’kidlamoqda. Yangi cheklovlar yil sayin bolalar iste’mol qiladigan kaloriya miqdorini 7,2 milliardga kamaytirish va semizlikka chalingan bolalar sonini 20 ming nafarga qisqartirishni maqsad qilgan. Uzoq muddatda esa bu choralar sog‘liqni saqlash xarajatlarini qariyb 2 milliard funt sterlingga tejashi kutilmoqda.
Eslatib o‘tish joiz, Buyuk Britaniya 2018 yildan buyon “shakar solig‘i”ni ham joriy etgan. Unga ko‘ra, shakar miqdori yuqori bo‘lgan alkogolsiz ichimliklar ishlab chiqaruvchilari qo‘shimcha soliq to‘laydi. Bu ham aholini sog‘lom turmush tarziga undashga qaratilgan choralardan biri hisoblanadi.
“Zamin”ni Telegramʻda oʻqing! 
Ctrl
Enter
Xato topdIngizmi?
Iborani ajratib Ctrl+Enter tugmasini bosing 
