Venesuela ichki ishlar vaziri Diosdado Kabello AQSh harbiy amaliyoti oqibatida kamida 100 kishi halok bo‘lganini ma’lum qildi. Uning so‘zlariga ko‘ra, ushbu hujum natijasida prezident Nikolas Maduro hokimiyatdan chetlatilgan. Bu haqda vazir chorshanba kuni kechqurun bayonot berdi.
Rasmiylar avvalroq qurbonlar soni bo‘yicha aniq ma’lumot bermagan edi. Venesuela armiyasi hozircha halok bo‘lgan 23 nafar harbiy xizmatchi nomini e’lon qildi. Shuningdek, Kuba tomoni ham Venesuelada bo‘lgan 32 nafar kubalik harbiy va razvedka xodimi halok bo‘lganini bildirdi.
Kabelloning aytishicha, harbiy amaliyot vaqtida Nikolas Maduro oyog‘idan jarohat olgan, uning rafiqasi Silia Flores esa bosh qismidan jarohatlangan. Ular AQSh harbiylari tomonidan qo‘lga olingan.
Venesuelaning vaqtinchalik prezidenti Delsi Rodriges halok bo‘lgan harbiylar xotirasiga bir haftalik motam e’lon qildi. Ushbu voqealar mamlakatdagi vaziyatni yanada keskinlashtirib, xalqaro hamjamiyat e’tiborini tortmoqda.
“Zamin”ni Telegramʻda oʻqing!
