Ispaniyaning Valensiya shahri yaqinidagi Manises aeroportida kutilmagan holat ko‘pchilikni hayratda qoldirdi. 24 yoshli erkak parvozga tayyor turgan samolyot ustiga chiqib, tom qismida “sahna” qilib yurdi.
Xabarlarga ko‘ra, voqea 2 fevral kuni sodir bo‘lgan. Marokash fuqarosi qanday qilib cheklangan hududga kirib olgani hozircha aniq emas. U Vueling aviakompaniyasiga tegishli Airbus A320 samolyotiga zinapoya orqali ko‘tarilib, keyin uchoqning tom qismida ko‘rinish bergan.
Guvohlar aytishicha, u samolyot tomida raqsga tushgan, qo‘l harakatlari bilan pastdagilarni masxara qilgandek bo‘lgan va aeroport xodimlarining ishiga halal bergan. Qo‘lidagi ichimlikdan bir ho‘plab, uni tuflagandek qilib, keyin idishini yerga otgani ham qayd etilgan. Shundan so‘ng u ikki marta samolyot tomi bo‘ylab yugurib, xodimlarni ataylab chalg‘itishda davom etgan.
Oqibatda fuqarolik gvardiyasining uch nafar xodimi uni tushishga ko‘ndirgan. Erkak qarshilik ko‘rsatmasdan pastga tushgan va keyin Valensiyadagi kasalxonaning psixiatriya bo‘limiga yuborilgan. Hozircha unga rasmiy ayblov qo‘yilgan-qo‘yilmagani haqida aniq ma’lumot yo‘q.
Bu voqea sabab Vueling’ning Amsterdamga uchishi kerak bo‘lgan reysi sezilarli kechikkan. Yo‘lovchilar taxminan ikki yarim soat davomida yangi parvozni kutishga majbur bo‘lgan va keyin boshqa samolyotda Niderlandiyaga yo‘l olgan.
“Zamin”ni Telegramʻda oʻqing!
