Eronning yangi diniy rahnamosi Mujtaba Xominaiy haqidagi navbatdagi xabarlar Yaqin Sharqdagi axborot maydonini yanada qizitib yubordi. The New York Times o‘zining Erondagi uchta manbasiga tayanib, urushning birinchi kuniyoq Mujtaba Xominaiy oyog‘idan yaralangani va shu sababdan saylanganidan beri omma oldiga chiqmayotgani hamda hech qanday chiqish yoki bayonot bermayotgani haqida yozdi.
NYT suhbatdoshlarining aytishicha, yaradorlik haqida ularga “hukumatdagi ancha yuqori lavozimli shaxs” ma’lum qilgan. Shu bilan birga, yangi rahbar hushyor holda ekani, aloqa vositalari ishlatilmaydigan, xavfsizligi qattiq qo‘riqlanadigan maxsus joyda yashiringani qayd etilgan. Bunday “ko‘rinmaslik” esa bugungi kundagi harbiy xavflar fonida uning xavfsizligini maksimal ta’minlash istagi bilan ham izohlanmoqda.
Qizig‘i, Isroil tomonida ham shunga yaqin xulosa aytilmoqda: Reuters’ning xabar berishicha, Isroil razvedkasi Mujtaba Xominaiy 28 fevral kuni boshlangan zarbalar oqibatida yengil yara olgan, degan baholashga kelgan.
Gazeta yana bir “bilvosita ishora”ga urg‘u bergan: Eron davlat OAVlarida va ayrim rasmiy tabrik matnlarida Xominaiyga nisbatan “yarador urush faxriysi” mazmunidagi atama ishlatilgani ham turli taxminlarni kuchaytirgan. Bu kabi atamalar odatda tasodifan qo‘llanmaydi, deb baholayapti kuzatuvchilar.
Biroq Eron tomonida bu gaplarga qarshi rad javoblar ham bor. Xususan, prezident Pizishkiyonning o‘g‘li (ba’zi manbalarda u davlat maslahatchisi sifatida tilga olinadi) 10-mart kuni Telegram kanali orqali Mujtaba Xominaiy haqidagi “yarador” degan xabarlarni eshitganini, aloqada bo‘lgan odamlardan so‘raganini va “u sog‘-salomat, muammo yo‘q” degan javob olganini aytgan.
Yana bir jihat: bu mavzudagi gap-so‘zlar birinchi marta ham emas. 7 mart kuni Isroil OAVlarida ham shunga o‘xshash xabarlar chiqqan, unda Mujtaba Xominaiy 28 fevraldagi hujumlar ortidan yaralangan bo‘lishi mumkinligi aytilgan edi. Keyin 8-mart kuni Eron rasmiy nashrlari yangi diniy rahnamo saylanganini e’lon qildi va bu kutilganidek marhum rahbarning ikkinchi o‘g‘li — 56 yoshli Mujtaba Xominaiy bo‘lib chiqdi.
Qisqasi, hozirgi manzara shunday: bir tomonda — xalqaro OAVlar va ayrim razvedka baholashlari “yara olgan bo‘lishi mumkin” degan versiyani olg‘a suryapti, ikkinchi tomonda — rasmiy doiralar “u sog‘” deya rad etyapti. Bunday vaziyatda esa eng katta savol bitta: yangi rahbar omma oldiga qachon chiqadi va shaxsan o‘zi nuqta qo‘yadi? Chunki hozirgi sukut har qanday mish-mishni “yoqilg‘i” bilan ta’minlab turibdi.
“Zamin”ni Telegramʻda oʻqing!
