AQSH Milliy aksilterror markazining sobiq direktori Jo Kent nafaqat o‘z iste’fosi, balki shaxsiy qarashlari va faoliyati bilan ham jamoatchilik e’tiborini tortmoqda. U Tramp ma’muriyatida Eron bilan bog‘liq harbiy siyosatga qarshi chiqqan ilk amaldor sifatida qayd etildi va bu orqali amaldagi siyosiy yo‘nalishga ochiq e’tiroz bildirgan kam sonli rasmiylar qatoriga kirdi.
Kentning siyosiy faoliyati ham ancha murakkab yo‘ldan o‘tgan. U ilgari ikki marta Kongressga saylanishga harakat qilgan, biroq har ikki urinish ham muvaffaqiyatsiz yakunlangan. Shunga qaramay, 2024 yil iyulida u kichik ustunlik bilan Milliy aksilterror markazi rahbari lavozimiga tasdiqlangan edi.
Uning nomzodi muhokamasi jarayonida bir qator bahslar yuzaga kelgan. Ayrim demokratlar Kentni ekstremistik guruhlar, jumladan Proud Boys tashkiloti a’zolari bilan aloqadorlikda ayblashgan. Shuningdek, u 6 yanvar voqealari va 2020 yilgi saylovlar bo‘yicha bahsli fikrlaridan ham voz kechmagan.
Jo Kent harbiy tajribasi bilan ham ajralib turadi. U AQSH qurolli kuchlari safida 11 marta xorijiy xizmat safarida bo‘lgan, jumladan Iroqdagi maxsus kuchlar tarkibida xizmat qilgan. Ushbu tajriba uni xavfsizlik sohasida chuqur bilim va amaliy ko‘nikmalarga ega mutaxassis sifatida shakllantirgan.
Ma’lumot o‘rnida aytish joiz, Milliy aksilterror markazi AQSHdagi eng muhim xavfsizlik tuzilmalaridan biri bo‘lib, u Markaziy razvedka boshqarmasi, Federal qidiruv byurosi, Pentagon va Ichki xavfsizlik vazirligi xodimlarini birlashtiradi. Bu idora AQSH milliy razvedkasi direktori Talsi Gabbard boshchiligida faoliyat yuritadi va Kent shu yerda asosiy maslahatchilardan biri hisoblangan.
Qizig‘i shundaki, Donald Tramp ma’muriyatida Eron bilan bog‘liq siyosat masalasida yakdil fikr mavjud emas. Turli qarashlar to‘qnashuvi kuzatilgan: Tramp omma oldida qat’iy pozitsiya namoyon etgan bo‘lsa, ayrim hollarda ichki muhokamalarda ehtiyotkorlikka chaqirgan. Vitse-prezident Jey Di Vens bilan ham bu borada muayyan qarama-qarshiliklar bo‘lgani aytilmoqda.
Jo Kent esa aynan shu masalada o‘zining mustaqil pozitsiyasini namoyon qildi. U yangi urushlarga kirishish o‘rniga AQSH ichki muammolariga ko‘proq e’tibor qaratish lozimligini ta’kidlab kelgan. Shu jihatdan uning iste’fosi nafaqat shaxsiy qaror, balki AQSH siyosiy elitasidagi fikrlar xilma-xilligini ko‘rsatuvchi muhim voqea sifatida baholanmoqda.
“Zamin”ni Telegramʻda oʻqing!
