Errol Mask — amerikalik tadbirkor Ilon Maskning otasi — RIA Novosti nashriga bergan intervyusida, uning fikricha, moliyachi Jeffri Epshteyn hanuzgacha tirik ekanini ma’lum qildi.
“U aniq tirik. Epshteyn o‘lmagan. Bunda hech qanday shubha yo‘q. Men shuni nazarda tutyapmanki, u o‘lgan bo‘lishi ehtimoli hatto juda ham past darajada ham yo‘q”, — dedi Mask.
U, shuningdek, Epshteynning o‘limi bo‘yicha rasmiy ma’lumotlarni shubha ostiga olib, uning jasadi topilgan vaziyatlarga e’tibor qaratdi. Maskning so‘zlariga ko‘ra, hodisa sodir bo‘lgan paytda kuzatuv kameralari o‘chirilgan, qamoqxona qo‘riqchilari esa uxlayotgan bo‘lgan.
AQSH Adliya vazirligi ma’lumotlariga ko‘ra, Epshteyn saqlangan qamoqxonadagi kuzatuv kamerasi yozuvida 23:58:58 dan 00:00:00 gacha bo‘lgan 62 soniyalik vaqt oralig‘i mavjud emas. Bu holat eski videokuzatuv tizimining har kuni avtomatik ravishda qayta ishga tushirilishi bilan izohlangan.
2019 yilda AQSHda Epshteynga voyaga yetmaganlarni jinsiy ekspluatatsiya maqsadida savdoga qo‘yish hamda bunday faoliyatga jalb qilish uchun til biriktirish ayblovlari qo‘yilgan edi. O‘sha yilning iyul oyi oxirida u vafot etdi. O‘tkazilgan tergov yakunlariga ko‘ra, AQSH rasmiylari Epshteyn o‘z joniga qasd qilgan degan xulosaga kelgan.
“Zamin”ni Telegramʻda oʻqing!
