Amerikalik jurnalist va siyosiy sharhlovchi Taker Karlson AQSHning harbiy qudrati haqida keskin bayonot berib, jamoatchilikda katta muhokamalarga sabab bo‘ldi. Uning fikricha, mamlakat o‘zini dunyodagi eng kuchli armiyaga ega davlat sifatida namoyon etsa-da, amalda bu darajada ta’sir ko‘rsata olmayotgani ayon bo‘lmoqda.
Karlson savol qo‘ydi: agar AQSH haqiqatan ham shunchalik qudratli bo‘lsa, nega u Eronni Hormuz bo‘g‘ozini ochishga majbur qila olmayapti? U bu holatni jiddiy muammo sifatida baholab, “biz o‘zimiz aytganchalik kuchli emas ekanmiz”, degan xulosaga keldi.
Sharhlovchiga ko‘ra, bunday vaziyat nafaqat mamlakat nufuziga putur yetkazadi, balki xavfli oqibatlarga ham olib kelishi mumkin. U “oddiy davlat” sifatida ta’riflagan Eronning bunday ta’sir ko‘rsatishi AQSH uchun salbiy signal ekanini ta’kidladi.
Karlson, shuningdek, mavjud holatni yashirmasdan, ochiq tan olish va xulosa chiqarish zarurligini urg‘uladi. “Bu holatni to‘g‘rilash uchun, avvalo, nima yuz berganini rostdan ham tan olishimiz kerak. Endi yolg‘onga o‘rin yo‘q”, — dedi u.
Ushbu bayonot xalqaro maydonda turli munosabatlarga sabab bo‘lib, AQSHning harbiy salohiyati va global ta’siri haqidagi bahslarni yanada kuchaytirdi.
“Zamin”ni Telegramʻda oʻqing!
