Eyfel minorasining zinapoyasi kimoshdiga chiqmoqda

Fransiya poytaxti — Parijdagi mashhur Eyfel minorasi bilan bog‘liq yana bir qiziqarli yangilik e’lon qilindi. Afsonaviy inshootning asl zinapoyasiga tegishli bo‘lgan noyob parcha yaqin kunlarda kimoshdi savdosiga qo‘yilishi rejalashtirilmoqda. Bu haqida “The New York Times” xabar berdi.

Ma’lumotlarga ko‘ra, sotuvga chiqarilayotgan ushbu fragment avval mehmonlarga minoraning ikkinchi qavatidan uchinchi qavatiga ko‘tarilish imkonini bergan aylanma zinapoyaning bir qismi bo‘lgan. Tarixiy manbalarda qayd etilishicha, 1983 yilda mazkur konstruksiya demontaj qilinib, jami 24 bo‘lakka ajratilgan. Shulardan 20 tasi allaqachon turli auksionlar orqali o‘z egalarini topgan.

Endilikda esa sotuvga qo‘yilayotgan ushbu qism qolgan eng so‘nggi fragment sifatida alohida e’tibor qozonmoqda. Ilgari, xususan 2016 yilda zinapoyaning shunga o‘xshash bo‘lagi rekord darajada — 611 ming dollarga sotilgani ham bu lotga bo‘lgan qiziqishni yanada oshiradi.

Auksionni tashkil etayotgan Artcurial savdo uyi bu safar ham yangi rekord o‘rnatilishiga umid qilmoqda. Mutaxassislar bahosiga ko‘ra, lotning boshlang‘ich narxi 146 mingdan 176 ming dollargacha bo‘lishi mumkin.

Qayd etish joiz, ushbu tarixiy buyum hozirga qadar 1983 yilda uni sotib olgan fransiyalik tadbirkor mulkida saqlanib kelgan.

Eslatib o‘tamiz, Eyfel minorasi 1889 yilda o‘tkazilgan Butunjahon ko‘rgazmasi uchun muhandis Gyustav Eyfel tomonidan loyihalashtirilib, qisqa fursatda dunyoning eng taniqli ramzlaridan biriga aylangan. Bugungi kunda ham u nafaqat Fransiyaning, balki butun dunyoning eng mashhur diqqatga sazovor maskanlaridan biri hisoblanadi.