AQShning birinchi xonimi Melaniya Tramp Oq uyda qilgan chiqishida moliyachi va jinoyatchi sifatida tanilgan Jefri Epshteyn bilan bog‘liq har qanday aloqani qat’iy rad etdi. Bu haqda The Washington Post xabar berdi.
Melaniya unga nisbatan bildirilayotgan noaniq va asossiz da’volarni “yolg‘on” deb atab, ularga zudlik bilan chek qo‘yilishi kerakligini ta’kidladi. U Epshteynning jabrdiydalarga nisbatan sodir etgan zo‘ravonliklariga hech qanday shaklda aloqasi bo‘lmaganini qayd etdi.
Shu bilan birga, u Epshteyn va uning yaqin hamkori Gisleyn Maksvellni faqat tanishlar sifatida ta’riflab, ular 2000-yillar boshida u hamda Donald Tramp ishtirok etgan ayrim tadbirlarda tasodifan uchrashib qolganini aytdi.
AQSh prezidenti rafiqasi uning obro‘siga putur yetkazishga qaratilgan harakatlarni “manfaatli va siyosiy maqsadlarga yo‘g‘rilgan tuhmat” deb atadi va bunday da’volar to‘xtatilishi shartligini bildirdi.
Melaniya Kongressni Epshteyn jabrdiydalari bo‘yicha tinglovlar o‘tkazishga chaqirdi. Biroq jurnalistlar savollariga javob berishdan bosh tortdi.
AQSh prezidenti esa MS NOW telekanaliga bergan qisqa izohida, rafiqasining bayonotidan avval bu mavzu haqida xabardor bo‘lmaganini aytdi. Shuningdek, u Melaniya Epshteynni shaxsan tanimasligini qo‘shimcha qildi.
Melaniyaning Epshteyn bilan ehtimoliy aloqalari haqidagi muhokamalar joriy yil boshidan beri qayta faollashgan. Bunga 2002 yilda Maksvellga yuborilgan elektron xatning oshkor etilishi sabab bo‘lgan.
O‘sha maktubda u Maksvellni “G” deb atab, Nyu-Yorkka qaytgach, albatta bog‘lanishni so‘ragan. Shuningdek, u jurnalda chiqqan suratlar yuzasidan ham ijobiy fikr bildirgan.
Melaniya esa bu yozishmalarni oddiy, tasodifiy xat almashuv sifatida baholagan hamda Epshteyn bilan bog‘liq hech qanday noqonuniy joylarda bo‘lmaganini ta’kidlagan.
2019 yilda jinoyat ishi bo‘yicha hibsda vafot etgan Epshteyn bilan bog‘liq hujjatlar keyinchalik ommaga oshkor qilingach, bu mavzudagi bahslar yana kuchaygan.
So‘nggi oylarda boshqa geosiyosiy va iqtisodiy masalalar bu mavzudan diqqatni biroz chetlatgan bo‘lsa-da, Melaniyaning yangi bayonoti masalani yana kun tartibiga olib chiqishi mumkin.
“Zamin”ni Telegramʻda oʻqing!
