Eron parlamenti raisi Muhammad Bag‘ir G‘olibaf hozirgi harbiy qarama-qarshilik va mamlakatning asimmetrik urushdagi o‘rni haqida batafsil bayonot berdi. U AQSH moliyaviy resurslar, qurol-yarog‘ va jangovar tajriba jihatidan sezilarli ustunlikka ega ekanini, shuningdek mintaqadagi ittifoqchisi Isroil ham muhim harbiy kuch sifatida namoyon bo‘layotganini ochiq tan oldi. Biroq u pul va texnika har doim ham urush natijasini hal qilmasligini taʼkidladi.
G‘olibafning so‘zlariga ko‘ra, Eron puxta rejalashtirish va tayyorgarlik orqali maydonda ustunlikka erishmoqda, raqib tomon esa strategik xatolarga yo‘l qo‘yayotgani hamda Eron xalqining irodasini to‘g‘ri baholay olmayotgani qayd etildi.
U jamiyatning hozirgi holati avvalgi yillarga nisbatan mamlakatni himoya qilishga ancha tayyor ekanini bildirdi. Uning fikricha, xalq bardoshliligining yaqqol namunasi sifatida qariyb ellik kun davomida uzluksiz ommaviy faollik va ko‘chalarga chiqish holatlari qayd etilgan.
Parlament spikeri so‘nggi oylarda Eron havo mudofaa tizimi misli ko‘rilmagan natijalar ko‘rsatganini, taxminan 180 ta dushman droni yo‘q qilinganini taʼkidladi. Uning aytishicha, bu ko‘rsatkichlar avvalgi mojarolarda kuzatilmagan darajada.
G‘olibaf F-35 qiruvchi samolyoti urib tushirilgan holatni tasodif emas, balki puxta rejalashtirilgan va texnik jihatdan murakkab operatsiya natijasi sifatida izohladi. Uning taʼkidlashicha, zamonaviy raketa tizimining yuqori texnologiyali samolyot yaqinida portlashi Eronning harbiy-texnologik salohiyati sezilarli darajada o‘sganini ko‘rsatgan.
Umuman olganda, G‘olibaf Eron irodasi va strategiyasi tashqi moliyaviy ustunlikdan ham kuchliroq omil ekanini taʼkidladi.
“Zamin”ni Telegramʻda oʻqing!
