Trampga qilingan hujum Eron bilan bogʻliqmi?
Donald Trump Oq uy muxbirlari tadbiridagi otishma voqeasi Eron bilan bog‘liq ekanligi haqidagi taxminlarni rad etib, bu hodisa uning siyosiy rejalariga ta’sir qilmasligini bildirdi. Hujumni sodir etishda gumonlanayotgan 31 yoshli Kaliforniya rezidenti qo‘lga olingan bo‘lib, u katta ehtimol bilan yakka tartibda harakat qilgani aytilmoqda. Mazkur hodisa oqibatida Maxfiy xizmat xodimlaridan biri yaralangan, biroq uning hayotini zirhli nimcha saqlab qolgan.
Donald Tramp Oq uy muxbirlari assotsiatsiyasining kechki tadbirida sodir boʻlgan otishma voqeasi Eron bilan bogʻliq boʻlishi mumkinligi haqidagi taxminlarni shubha ostiga oldi. Bu haqda Tramp Vashingtonda yuz bergan ushbu hodisadan keyin Oq uyda oʻtkazilgan brifing davomida maʼlum qildi.
U matbuot anjumani chogʻida “bu voqea bilan Eron atrofidagi vaziyat oʻrtasida bogʻliqlik mavjud emas deb hisoblayman” deya qayd etdi. Shu bilan birga, Prezident ushbu hodisa uning siyosiy qarashlariga taʼsir oʻtkazmasligini taʼkidlab, “bu meni toʻxtatmaydi va Eronga nisbatan gʻalabaga erishish yoʻlimga toʻsqinlik qilmaydi” deya fikr bildirdi.
Trampning baholashicha, hujumni amalga oshirgan shaxs katta ehtimol bilan yakka tarzda harakat qilgan.
AQSH ommaviy axborot vositalari esa tergovga yaqin manbalarga asoslanib, gumonlanuvchi 31 yoshli Koul Tomas Allen ekanini xabar qilmoqda. U Kaliforniya shtatida istiqomat qilgan boʻlib, ayni vaqtda qoʻlga olingan va soʻroq qilinmoqda. Unga nisbatan rasmiy ayblovlar eʼlon qilinishi kutilmoqda.
Hujumni sodir etgan shaxs qoʻlga olingan, voqea paytida AQSH Maxfiy xizmati xodimlaridan biri jarohat olgan. Prezidentning soʻzlariga koʻra, uning hayotini bronjilet asrab qolgan.
Izohlar 0
…