Xalqaro maydonda yana bir ta’sirli va bahsli bayonot yangradi. Eronning Armanistondagi diplomatik vakolatxonasi AQSH rasmiysiga yo‘llagan murojaati bilan jamoatchilik e’tiborini tortdi. Diplomatik missiya xabari X ijtimoiy tarmog‘ida paydo bo‘ldi.
Gap shundaki, Kerolin Levitt yaqinda qiz farzandli bo‘lgani munosabati bilan tabriklangan. Eronlik diplomatlar uning onalik baxtiga samimiy munosabat bildirib, barcha bolalar mehr va himoyaga loyiq ekanini ta’kidlagan.
Biroq ushbu tabrik ortidan keskin va o‘ylantiruvchi murojaat ham keltirilgan. Diplomatik vakolatxona o‘z bayonotida AQSH tomonidan berilgan havo zarbasi oqibatida halok bo‘lgan bolalar taqdirini eslatgan. Ular ayniqsa Minab hududidagi maktabga qilingan hujumni tilga olib, bu voqeada ko‘plab qiz bolalar qurbon bo‘lganini qayd etgan.
«O‘z farzandingizni bag‘ringizga bosganingizda, o‘sha halok bo‘lgan bolalarning onalari haqida ham bir lahza o‘ylab ko‘ring», — deya yozilgan diplomatik missiyaning ijtimoiy tarmoqdagi sahifasida.
Ushbu bayonot nafaqat tabrik, balki siyosiy va insoniy mazmundagi murojaat sifatida baholanmoqda. Unda bolalar taqdiri, tinch aholi xavfsizligi va harbiy harakatlarning oqibatlari haqida jiddiy mulohazalar ilgari surilgan.
“Zamin”ni Telegramʻda oʻqing!
