Rossiya prezidenti Vladimir Putin va Xitoy rahbari Si Szinpin Pekinda bo‘lib o‘tadigan uchrashuv davomida yangi xalqaro tartib va ko‘p qutbli dunyo shakllanishiga oid qo‘shma deklaratsiyani qabul qilishi kutilmoqda.
Bu haqda Rossiya prezidentining xalqaro masalalar bo‘yicha yordamchisi Yuriy Ushakov ma’lum qildi. Uning aytishicha, ikki davlat yetakchilari uchrashuvda strategik sheriklikni yanada kuchaytirish, qo‘shnichilik, do‘stlik va hamkorlik aloqalarini chuqurlashtirishga qaratilgan qo‘shma bayonotni ham imzolaydi.
Ushakovning ta’kidlashicha, tayyorlanayotgan hujjat keng qamrovli dasturiy deklaratsiya bo‘lib, 47 sahifadan iborat. Unda Rossiya va Xitoyning xalqaro maydondagi hamkorligi, global xavfsizlik, yangi turdagi davlatlararo munosabatlar hamda ko‘p markazli dunyo tartibi haqidagi qarashlari aks etishi kutilmoqda.
Mazkur deklaratsiya Moskva va Pekin o‘rtasidagi siyosiy muloqot tobora faollashib borayotgan bir paytda qabul qilinmoqda. Hujjat ikki davlatning global jarayonlarga nisbatan umumiy yondashuvini namoyish etuvchi muhim siyosiy signal sifatida baholanmoqda.
“Zamin”ni Telegramʻda oʻqing!
