Fransuz elchisi Avstraliya hukumati harakatini xoinlik deb atadi

Avstraliyaning suvosti kemalari bo‘yicha Fransiya bilan tuzgan shartnomani bekor qilishi ikki davlat o‘rtasida mojaroga sabab bo‘ldi: Kanberradan chaqirib olingan fransuz elchisi Jan-Per Tebo Avstraliya hukumatining harakatini xoinlik deb baholadi.

«Bizda bunga (ya’ni shartnomani bekor qilishga) 18 oy davomida tayyorgarlik ko‘rilgani haqida ishonchli ma’lumotlar bor», – dedi elchi The Sydney Morning Herald nashriga bergan intervyusida.

Teboning aytishicha, Avstraliya Mudofaa vaziri Piter Datton shartnomaning buzilishi haqida OAVda xabarlar taqalganidan keyingina fransiyalik hamkasbi bilan bog‘langan. Shuningdek, u Avstraliya bilan kattaroq loyihalarni amalga oshirish rejalashtirilganini aytib, hozirgi vaziyatda Fransiyaning orqasidan pichoq sanchilganini ta’kidladi.

Eslatib o‘tamiz, Avstraliya, Britaniya va AQSH 15 sentabr kuni xavfsizlik sohasida yangi hamkorlik – AUKUSga asos solinganini e’lon qildi. Hamkorlik doirasida Avstraliya Amerika texnologiyasi yordamida sakkizta atom suvosti kemasi quradi. Buning uchun esa Fransiya bilan tuzilgan yirik shartnoma bekor qilindi. “Zamin”ni Telegramʻda oʻqing!