Xalqaro sud Ukraina soʻroviga koʻra Rossiyaga nisbatan tergov boshlamoqda

^{Xalqaro jinoiy sud bosh prokuror Karim Xon.}
Haagadagi xalqaro jinoiy sud bosh prokurori Karim Xon Ukraina soʻroviga koʻra Rossiya mansabdor shaxslariga nisbatan ehtimoliy ogʻir jinoyatlar yuzasidan surishtiruv-tergov boshlashga qaror qildi.

«Men Ukrainadagi vaziyat boʻyicha dastlabki xulosalar bilan tanishdim va surishtiruv-tergov boshlash uchun etarli asos mavjud ekaniga ishonch hosil qildim. Allaqachon jamoamga dalillar yigʻish va saqlash imkoniyatlarini oʻrganib chiqishni topshirdim. Barcha davlatlar hamda xalqaro hamjamiyatdan faoliyatimni qoʻllab-quvvatlashlarini soʻrayman», – deb bayonot berdi Karim Xon.

Haaga sudi bosh prokurori Ukrainaga holatga baho berar ekan, tomonlarni vazminlik va xalqaro gumanitar huquq me'yorlariga rioya qilishga chaqirgan.

Xalqaro jinoiy mahkama Ukrainadagi ehtimoliy genotsid hamda harbiy jinoyatlarni taftish etadi. Rossiya ham, Ukraina ham Rim statuti ishtirokchisi boʻlmagani sababli xalqaro sud agressiya (bosqinchilik) jinoyatini taftish etish vakolatiga ega emas.

Avval xabar berganimizdek, joriy yil 27 fevral kuni Ukraina Rossiyaga qarshi Haagadagi xalqaro sudga rasman da'vo arizasi kiritdi.

Xalqaro jinoiy sud – doimiy asosda faoliyat yurituvchi mustaqil yuridik organ boʻlib, 1998 yil 17 iyulda imzolangan Rim statutiga asosan ta'sis etilgan. Mahkama xalqaro miqyosdagi ogʻir qilmishlar – genotsid, insoniyatga qarshi va harbiy jinoyatlarni koʻrib chiqadi.

Ukraina Rim statutini 2000 yil 20 yanvarda imzolagan, ammo hali ratifikatsiya qilganicha yoʻq.

2016 yilda xalqaro sud Qrimning Rossiya tomonidan anneksiya qilinishini harbiy ziddiyat deb e'lon qilgach, rasmiy Moskva Rim statutida ishtirok etishdan bosh tortgan.

Britaniyalik huquqshunos va diplomat Karim Xon bir yil avval Xalqaro jinoiy sud bosh prokurori lavozimiga saylangan. U 2008 yilda Rossiya va Gruziya oʻrtasidagi urush vaqti roʻy bergan ehtimoliy harbiy jinoyatlarni ham oʻrganib keladi. “Zamin” yangiliklarini “Telegram”da kuzatib boring