Ukrainadagi urushda boʻlib qaytgan rossiyalik jurnalist: Mudhish lotereya haqida

Elena Kostyuchenko Ukrainaga Rossiyaning «Novaya gazeta» muxbiri sifatida borgan edi. Uning Odessa, Xerson va Nikolaev shaharlarida tayyorlangan reportajlari ushbu gazetada tsenzura cheklovlari bilan e'lon qilingan. Rossiya Federatsiyasi qonunchiligiga rioya qilinganiga qaramay, Bosh prokuratura va «Roskomnadzor» talabi bilan matnlar oʻchirib tashlangan, «Novaya gazeta» esa oʻz ishini toʻxtatishga majbur boʻlgan.

«Novaya gazeta. Evropa» nashri uchun maxsus ravishda Elena Kostyuchenko Ukrainadagi urushda oʻzi koʻrgan narsalar haqida gapirib berdi.

— Juda koʻplab oddiy tinch fuqarolar urushning ilk kunlaridan shaharni tark etib xatolikka yoʻl qoʻydi, ular qishloqlarga, shaharlar tashqarisiga ketib, u erda jiddiy jangovar harakatlar boʻlmaydi, deb umid qilgan. Oxir-oqibat, aksariyat shaharlarda front chizigʻi aynan qishloqlar va shahar tashqarisidan oʻtdi. Mana hozir Bucha va Gostomel misolida biz qishlogʻingda Rossiya qoʻshinlari turganida nima sodir boʻlishi haqidagi dahshatli haqiqatni bilib olyapmiz. Qamal qilingan yagona yirik shahar — eng dahshatli misol, — bu Mariupol. Shahar deyarli vayron qilingan.

Umuman olganda, odamlar qishloqlarga ketib, notoʻgʻri tanlov qildi, deb men aytayapman. Aslida urushda toʻgʻri yoki notoʻgʻri tanlov qilib boʻlmaydi. Qaysidir yoʻlni tanlayotganingda, u seni qutqarib qolishi yoki oʻlimga olib kelishini oldindan bila olmaysan. Ayniqsa, yaqinlaringning hayoti senga bogʻliq boʻlganida, nafaqat oʻzing uchun, balki oʻz oilang uchun qaror qabul qilishing kerak boʻlsa, va sen nima qilishni bilmasang, bu doim elkangda turadigan yukdir. Ya'ni kimdir ketib, oʻsha erda halok boʻldi, kimdir esa ketishga urinib, barcha blokpostlardan oʻtib oldi va joʻnab ketdi, yana kimdir shahardan ketdi, ammo uni otib tashlashdi.

Menga shunday voqeani aytib berishgandi: Mariupolda ikki yigit egulik izlab chiqqan, hushtak ovozi eshitilganida, biri ikkinchisiga «yot» deb qichqirgan va ular ikki tomonga qarab yiqilgan. Ulardan biri tirik qolgan, ikkinchisini esa snaryad parchalari ikkiga boʻlib yuborgan.

Bu shunaqa mudhish, insoniy boʻlmagan lotereya. Aslida, mana shu narsa, oʻzini tutishning xavfsiz strategiyasi yoʻqligi urushda odamlarni juda azoblaydi. “Zamin” yangiliklarini “Telegram”da kuzatib boring