Qishda terini qanday parvarish qilish kerak?

^{© Sputnik / Ilya Naymushin}
Qishda terimiz ayniqsa himoyasiz boʻladi — uning holati quruq havo, past harorat va ifloslanish sababli yomonlashadi. Sputnik Oʻzbekiston toshkentlik shifokor-kosmetolog-onkolog Sibel Rizayevaga qish davrida terini toʻgʻri parvarish qilish borasida savollar bilan yuzlandi.

- Sovuq mavsumda va havoning ifloslanish darajasi oshishi bilan yuzaga keladigan asosiy teri muammolari qaysilar?
- Birinchi narsa quruqlik. Shu sababli teri ta'sirchanligi oshishi mumkin. Bundan tashqari, havo ifloslanish darajasi ham terining moddalar almashinuvining etishmasligiga olib kelishi mumkin: u toksinlarni toʻplay boshlaydi, chunki ulardan xalos boʻlishga ulgurmaydi. Shu sababdan, qurish, ta'sirchanlik va tez qarish kuzatiladi. Turgor (taranglik, elastiklik) va terining tonusi yomonlashadi.

- Teri tashqi muhit ta'siridan jabrlanayotganini qanday aniqlash mumkin?
- Buni tashqi koʻrinishidan va his qilish orqali aniqlash mumkin. Teri nozik boʻlib qoladi, notekis dogʻlar, qizarishlar, mahalliy yoki umumiy quruqlik, qichishish va achishish paydo boʻladi.

- Qishda terini kundalik parvarish qilish uchun qanday asosiy tavsiyalar berasiz?
- Asosiy qoida: quruq terini namlash, ta'sirchan terini tinchlantirish. Menga emolent kremlar juda yoqadi. Bu vositalar hamma uchun mos, ammo aknega moyil teri uchun parvarish shifokor tomonidan individual ravishda tanlanishi kerak.

- Qishda terini himoya qilish uchun parvarish kosmetikasida qaysi ingrediyentlar eng samarali?
- Yuqorida aytilganidek, bu emolentlar. Ular tarkibida terini davolaydigan, tiklaydigan va yumshatadigan, shuningdek, namlikni zarur miqdorda saqlaydigan yogʻ komponentlari mavjud.

- Sovuq mavsum boshlanishi bilan odatiy kosmetik vositalarni oʻzgartirish kerakmi?
- Faqat muammo yuzaga kelsa. Muammo paydo boʻlishiga qarab yangi parvarish vositalarini tanlash kerak.

- Terini himoya qilish va uning sogʻlom koʻrinishini saqlashga nima yordam beradi?
- Avvalo, sogʻlom turmush tarzi: sport, muvozanatli ovqatlanish, toʻliq uyqu va kun tartibiga rioya qilish. Ba'zida kosmetolog xizmatlaridan foydalanish mumkin.

- Terini ifloslanishdan tozalash uchun uyda qanday muolajalar qilish mumkin?
- Bir marta kechki yuvinish etarli. Agar teri juda iflos boʻlsa, bu amaliyotni ikki bosqichga boʻlish mumkin: balzam yoki gidrofil yogʻ bilan tozalash, keyin gel yoki koʻpik bilan yuvish. Shuningdek, haftada 1-3 marta enzim pudradan foydalaning. Ertalab gel yoki koʻpik bilan engil tozalash etarli. Terining himoya toʻsigʻini buzmaslik uchun haddan tashqari oshirib yubormaslik muhim.

- Havoning ifloslanishi ta'siridan keyin terini tiklashga yordam beradigan salon muolajalari bormi?
- Ha, albatta. Men faoliyatimda koʻpincha mezo-kokteyllar kabi in'ektsiya amaliyotlaridan foydalanaman. Bu terining holatini yaxshilaydigan va yoshga bogʻliq oʻzgarishlarni bartaraf etadigan preparatlar. Natijalar birinchi amaliyotdan seziladi. “Zamin” yangiliklarini “Telegram”da kuzatib boring