Olimlar: qahva ichish sog‘lom keksalik sari qo‘yilgan muhim qadamdir

Amerikalik tadqiqotchilar tomonidan o‘tkazilgan keng ko‘lamli va uzoq muddatli ilmiy izlanishlar ayollar salomatligida qahvaning o‘rni haqida qiziqarli va muhim xulosalarni aniqlab berdi. 30 yil davom etgan kuzatuv davomida 50 mingga yaqin ayolning hayot tarzi, ovqatlanish odatlari va umumiy salomatlik holati tahlil qilindi.

Natija: har kuni qahva iste’mol qilgan ayollar sog‘lomroq qariydi

Tadqiqot davomida aniqlanishicha, kuniga kamida bir finjon kofeinli qahva ichish ayollarni nafaqat tetik saqlagan, balki ularda jismoniy, aqliy va ruhiy barqarorlikni ham saqlab qolish ehtimoli yuqori bo‘lgan. Har to‘rt yilda yangilanib borilgan so‘rovnomalarda kofein manbalari — qahva, choy va gazli ichimliklar (masalan, kola) alohida ko‘rib chiqilgan. Ammo samarali ta’sir faqat qahvada kuzatilgan, choy va boshqa ichimliklarda bunday natija qayd etilmagan.

Tahlil qanday o‘tkazildi?

Tadqiqotda har bir ishtirokchining tanasi vazni, ta’lim darajasi, turmush tarzi, jismoniy faollik, spirtli ichimlik va sigareta iste’moli kabi bir qator omillar ham hisobga olingan. Har 80 milligramm kofeinning ta’siri alohida baholangan.

Qanday qahva miqdori sog‘lom qarishga olib kelishi mumkin?

Olimlar aniqlagan natijaga ko‘ra, kuniga taxminan 315 milligramm kofein (uchta kichik yoki bir yarim katta finjon qahva) ichgan ayollar 70 yoshdan keyin ham sog‘lom hayot kechirish imkoniyatiga ega bo‘lgan. Ma’lumotlarga ko‘ra, bu miqdordagi kofeinning 80 foizidan ko‘prog‘i aynan qahva orqali qabul qilingan.

Qahvaning har qo‘shimcha finjoni sog‘lom keksalik ehtimolini 2–5% ga oshirgan. Demak, kuniga beshta kichik yoki ikki yarim katta finjon qahva iste’mol qiluvchi ayollarda qarish jarayonidagi turli muammolar — surunkali kasalliklar, aqliy susayish, xotira muammolari va jismoniy pasayish ehtimoli ancha past bo‘lgan.

Sog‘lom qarish tushunchasi nima?

Ushbu tadqiqotda "sog‘lom qarish" tushunchasi — 70 yoshdan keyin ham faol hayot tarzini saqlash, surunkali kasalliklarsiz hayot kechirish, aqliy va xotira qobiliyatlarini yo‘qotmaslik, ruhiy jihatdan barqarorlikni saqlashni anglatadi.

Xulosa:
Mutaxassislar qahvani sog‘liq uchun xavfli emas, balki foydali odat sifatida baholashni taklif qilishmoqda. Biroq me’yordan oshmaslik va har bir insonning individual salomatlik holati hisobga olinishi zarur.

Qahva faqat ertalabgi tetiklik uchun emas, balki keksa avlodga sog‘lom yetaklash uchun ham o‘z hissasini qo‘shishi mumkin! “Zamin”ni Telegramʻda oʻqing!