Britaniyalik stomatolog Hanna Kinsella tish emali rangiga eng ko‘p ta’sir etuvchi mahsulotlarni sanab o‘tdi, deb yozadi Daily Mail.
Mutaxassisning ta’kidlashicha, pomidor, rezavorlar (malina, qorag‘at) va turli meva sharbatlaridagi kislota miqdori yuqori bo‘ladi. Ular tish emalini yemiradi va vaqt o‘tishi bilan mayda yoriqlar hosil qiladi. Bu esa tishlarning sariq yoki qahvarang tus olishiga sabab bo‘ladi.
Kinsellaning so‘zlariga ko‘ra, pomidorda antotsian va tanin pigmentlari ko‘p bo‘lib, ular tish emaliga yopishib qoladi va rangni o‘zgartiradi. Shuningdek, choy va qahva ham taninga boy bo‘lgani sababli tishda dog‘ qoldiradi.
«Choy va qahvadan voz kechish qiyin, lekin ularga sut qo‘shib ichish tish emaliga bo‘lgan ta’sirni kamaytiradi», — deydi mutaxassis.
Shuningdek, stomatolog apelsin va anor sharbatlarini kamroq iste’mol qilishni tavsiya etdi. Uning ta’kidlashicha, kislota va bo‘yovchi moddalar ko‘p bo‘lgan mahsulotlar tish salomatligiga jiddiy ta’sir ko‘rsatadi.
Kinsella so‘zlariga ko‘ra, sog‘lom va oq tishlar uchun asosiy qoida — me’yorni bilish va har bir ovqatdan so‘ng tishni tozalashni unutmaslikdir.
“Zamin”ni Telegramʻda oʻqing!
