Ko‘pchilik liftni oddiy mexanizm deb hisoblaydi: tugmachani bosasiz, kabina harakatga keladi va kerakli qavatga olib chiqadi. Lekin liftga inson omili qo‘shilganda, u faqat texnika emas — qulaylik va ruhiy xotirjamlikka ta’sir qiladigan joyga aylanadi.
Liftdagi ko‘zgu texnik jihatdan shart emas: ko‘zgu bo‘lmasa ham lift ishlayveradi. Ammo ko‘zgu foydalanish tajribasini yaxshilaydi: insonga xavfsizlik hissini, xotirjamlikni va qulaylikni beradi.
Oddiy qurilmalarda indikator, lampochka yoki signallar orqali “nima bo‘layapti?” degan tushuncha bor. Liftda esa tugmachani bosganingizdan keyin ko‘pincha sukunat — qavatlar almashsa ham, inson o‘zini noaniq his qilishi mumkin. Shu paytda ko‘zgu harakatni aks ettirib, kabina ichi “o‘lik quti”dek tuyulmasligiga yordam beradi, ruhiy zo‘riqishni pasaytiradi.
Kabina tor bo‘lgani uchun devorlar bosim beradi. Ko‘zgu esa chuqurlik illyuziyasini yaratib, liftni kengroqdek ko‘rsatadi va torlik hissini kamaytiradi. Yana bir muhim jihat: liftda tanish bo‘lmagan odamlar birga chiqqanda kim qayerga qarashni bilmay qoladi. Ko‘zgu neytral nuqta bo‘lib, noqulaylikni yumshatadi.
Shuningdek, kutishga to‘g‘ri kelib qolganda vaqt sekin o‘tayotgandek tuyuladi. Ko‘zgu e’tiborni chalg‘itib, kutishni yengillashtiradi. Amaliy foydasi ham bor: tor liftda burilish va harakat qilishni, ayniqsa nogironlik aravachasidagi inson uchun, osonlashtiradi.
Qisqasi liftdagi ko‘zgu liftni ishlatish uchun shart emas, lekin insonning o‘zini xotirjam, qulay va ishonchli his qilishi uchun juda kerak.
“Zamin”ni Telegramʻda oʻqing!
