Koronavirusdan himoyalanish: hammasi oddiy va biroz kulgili ham

^{Foto: REUTERS / Soe Zeya Tun}
O‘zbek xushchaqchaq millat. Ko‘cha kuyda koronavirus bilan bog‘liq ko‘plab hazillarni eshitishga ulgurdik. Shunday ekan, bu kasallikdan himoyalanish bo‘yicha maslahatlarda ham shu uslubdan foydalandik.

• Qo‘l berib salomlashmang (to‘g‘ri tushunishadi);
• Qo‘llarni sovunlab yuving (kir sovunmi, atir sovunmi, farqi yo‘q);
• Vaqti-vaqti bilan qo‘lingizni antiseptik salfetka yoki gel bilan tozalang (ha, shunaqa narsalar ham bor, shunchaki biz ularni ishlatishga o‘rganmaganmiz);
• Zarurat bo‘lmaganda yuz-ko‘zingizni qo‘l bilan ushlashdan voz keching (bahonada yumshoq yuzimiz dag‘al qo‘llarimizdan dam olsin);
• Yo‘talayotgan, aksirayotgan odam bilan masofa saqlang (shartta qochib ketmang, ko‘ngliga keladi);
• Telefon, pult, kompyuter va shunga o‘xshash ko‘p ishlatiladigan buyumlaringizni tozalab turing (o‘zi bu qoidaga koronavirus kelmasidan oldin ham amal qilish kerak edi. Mayli, hechdan ko‘ra kech);
• Yo‘talganingizda yoki aksirganingizda og‘zingiz va burningizni to‘sing (bu ham azaliy qoida, koronavirus tufayli dolzarb bo‘lib qoldi xolos);
• Niqob taqing, ammo uni tez-tez almashtirib turing (dorixonalarda topilmagani bahona bo‘lmasin, oddiy vositalardan oddiy niqoblar tayyorlash bo‘yicha o‘nlab usullar ko‘rsatildi);
• Odam ko‘p joyga bormang (choyxona kutib turadi);
• Och qolmaslikka, yaxshi ovqatlanishga harakat qiling (baribir choyxonaga boriladi shekilli...);
• Muntazam qaynatilgan suv iching, gazli ichimliklarni cheklang (ha, kolani ham);
• Hayvonlar bilan munosabatda ehtiyot bo‘ling (albatta, Hindiston tajribasini qaytarmaysiz, lekin jonivorlarni parvarishlashda yuqish xavfi borligini unutmaslik lozim);
• Xonalarni tez-tez shamollating, tashqariga chiqishga qo‘rqmang, toza havoda sayr qiling, chekishni cheklang (tashlamaysiz, tashlolmaysiz baribir);
• Yo‘tal, harorat, nafas qisishi kabi belgilar kuzatilsa, sarosimaga tushmay, darhol shifokorga murojaat qiling va boshqalar bilan kontaktni cheklab turing (katta ehtimol bilan oddiygina tumov yoki grippga chalingansiz, lekin baribir koronavirus aybdor tuyilaveradi);
• Unutmang, ayni kunlarda Sizning koronavirusga chalinish ehtimolingiz milliondan bir ham emas, hatto bu kasallik ko‘payib, 100 000/1 nisbatga kelganda ham bir o‘ylab ko‘ring, vahimaga arziydimi?

Salomat bo‘ling! Bu virus Sizni va yaqinlaringizni chetlab o‘tsin!!! “Zamin” yangiliklarini “Twitter”da kuzatib boring