Shavkat Mirziyoev Kelesdagi oʻzgarishlar, Zangiota va Yangiyoʻldagi loyihalar bilan tanishdi

^{Foto: Prezident matbuot xizmati}
Prezident Shavkat Mirziyoev 14 oktyabr kuni Toshkent viloyatida boʻlib, aholi hayoti va yangi loyihalar bilan tanishdi. Davlat rahbari dastlab Toshkent tumaniga tashrif buyurdi.

Prezident matbuot xizmatining qayd etishicha, ilgari bu tumanning markazi yoʻq edi. Keles yoʻli koʻchasi boʻylab yangi bino va majmualar qad koʻtargach, hududning qiyofasi tamoman oʻzgardi. Xususan, Keles yoʻli koʻchasi kengaytirilgan holda qayta qurildi. Uning ikki tarafida Davlat xizmatlari markazi, Yoshlar markazi, madaniyat saroyi, amfiteatr, universal sport majmuasi, xotira maydoni va sayilgoh kabi koʻrkam inshootlar barpo etildi.

Eski, pastqam uylar oʻrnida 41 ta koʻp qavatli turar joy qurildi. Endi ulardagi 2 536 ta xonadonda 11 mingdan ziyod aholi yashaydi. Bu uylarning yertoʻla va birinchi qavatida savdo, umumiy ovqatlanish, maishiy va moliyaviy xizmatlar boʻyicha 270 ta shoxobcha tashkil qilinmoqda. Ularda 1 350 kishi, jumladan, shu yerlik yoshlar va ayollar ishli boʻladi.


Davlat rahbari ushbu bunyodkorlik ishlarini koʻzdan kechirdi.

Renovatsiya loyihasida ijtimoiy infratuzilmaga katta e'tibor qaratildi. Markaziy shifoxona, tumanlararo perinatal markaz, bolalar bogʻchasi, “Inson” ijtimoiy xizmatlar markazi, tuman tarixi muzeyi ishga tushirildi. Oʻzgarishlar faqat tuman markazida emas. Hududda yaqin-yaqingacha ichimlik suvi muammo edi. Osiyo taraqqiyoti banki mablagʻlari hisobidan 4 ta havza qurilib, 365 kilometr quvur tortildi. Natijada 36 ta mahalla aholisi toza ichimlik suvi bilan ta'minlandi. Oxirgi uch yilda tumanda 218 kilometr ichki yoʻllar ta'mirlanib, asfalt yotqizildi. Bunday ishlar yana davom etmoqda, deyiladi xabarda.

Shu yerda Toshkent tumanida tadbirkorlikni rivojlantirish, aholini ish bilan ta'minlash va kambagʻallikdan chiqarish masalalari yuzasidan mutasaddilarning hisoboti eshitildi. Joriy yilning 6 oyida tuman iqtisodiyoti 23 foiz oʻsgan. Yangi qurilishlar va ulardagi korxonalar negizida soliq manbasi koʻpaygan. Toshkent tumanida 70 ta mahalla, 62 mingta oila bor. Ahvoli ogʻir boʻlgan 372 ta oilaga koʻmaklashish uchun mas'ullar va choralar belgilangan.


Rejadagi loyihalar, bandlik hamda tadbirkorlik dasturlari doirasida yil yakuniga qadar 34 ming 443 ta ish oʻrni yaratilishi moʻljallangan.

Prezident xonadonlardagi imkoniyatlarni yuzaga chiqarish, tadbirkorlarning kambagʻal oila vakillarini ishga olishini ragʻbatlantirish boʻyicha topshiriqlar berdi.

“Toshkent tumani poytaxtimizning yonginasida. Bu yerda uy-joy, ishlab chiqarish, tijorat, xizmat boʻyicha juda katta imkoniyatlar bor. Ish toʻgʻri tashkil qilinsa, oʻzi bu tumanda kambagʻalchilik boʻlishi mumkin emas. Shuning uchun iqtisodiy kompleksga, mahallalarga berayotgan imkoniyatlardan foydalanib, kambagʻallikdan farovonlik sari yurish kerak”, – dedi Shavkat Mirziyoev.

Toshkent tumanida yil yakuni bilan qariyb 53 million dollar investitsiya oʻzlashtirilishi hisobiga sanoatda oʻsish sur'ati 9 foiz, xizmat koʻrsatishda 13 foiz boʻlishi kutilmoqda. Eksport hajmini 100 million dollarga yetkazish maqsad qilingan.

Shavkat Mirziyoevning keyingi manzili – Zangiota tumanidagi “Technologies of real time” Oʻzbekiston–Singapur qoʻshma korxonasi boʻldi. Bu yerda 118 xil rusumdagi avtomobillarning yurish, transmissiya va boshqaruv tizimlari uchun 750 dan ortiq turdagi ehtiyot qismlar ishlab chiqarilmoqda. Modernizatsiya qilingan korxonadagi 12 ta tsexga Xitoy, Rossiya, Koreya Respublikasi, Yaponiya va AQShdan keltirilgan uskunalar oʻrnatilgan.

“Koʻp detallar mahalliylashtirilgani hozircha ma'qul. Mutaxassislar zoʻr boʻlsa, sifat ham, eksport ham oshadi”, – dedi prezident.

Shundan kelib chiqib, mutasaddilarga korxonada ehtiyot qismlar qatorini kengaytirish boʻyicha topshiriq berildi. Mahsulotlar buyurtma asosida Oʻzbekiston boʻylab yetkazib beriladi. Xususan, UzAuto Motors'ning ning Xorazm viloyatidagi zavodiga “Damas” va “Labo” avtomobillari uchun 773 ming dona ehtiyot qismlar yetkazib berilgan.


Tovarlarni texnik tekshiruv va sinovlardan oʻtkazish uchun zamonaviy laboratoriya tashkil etilgan. Korxona mahsulotlari IATF 16949:2016, ISO 9001:2015, ISO 45001:2020 hamda “Jeneral Motors”ning BIOS xalqaro sifat sertifikatlariga ega. Shu bois ularga xorijda ham talab bor. Xususan, oʻtgan yili Qozogʻiston, Qirgʻiziston, Tojikiston, Turkmaniston, Rossiya, Ukraina, BAAga 3 mln dollarlik ehtiyot qismlar yetkazib berilgan. Joriy yilning toʻqqiz oyida 2 mln dollardan ziyod mahsulot eksport qilingan.

Korxonada 220 ta ish oʻrni yaratilgan. Xodimlar shu yerdagi kurslarda oʻqitilib, keyin ishga qabul qilinadi.


Davlat rahbari zavoddagi ishlab chiqarish jarayoni bilan tanishdi, mutaxassislar bilan muloqot qildi. Korxona shourumida tayyor mahsulotlar namunalarini koʻzdan kechirdi.

Shu yerda kelgusi rejalar haqida ma'lumot berildi. Xususan, 2025 yilda 1,15 million dollarlik investitsiya loyihasi amalga oshiriladi. Natijada BYD, Chery, Changan, Geely avto, Dongfeng kabi yangi avtomobil brendlari uchun ehtiyot qismlar ishlab chiqarish oʻzlashtiriladi.

Loyiha samarasida 43 ta yangi ish oʻrni yaratiladi, ishlab chiqarish quvvatlari 180 mingdan, 280 ming donaga yetkaziladi.

Shavkat Mirziyoev Yangiyoʻl tumanidagi “Tinchlik” kichik sanoat zonasida ham boʻlib, qator korxonalar faoliyati bilan tanishdi. Bu sanoat zonasi 4 yil oldin 36 gektar maydonda tashkil etilgan edi. Muhandislik infratuzilmasi, ichki yoʻllar va binolar qurilib, ishlab chiqarish uchun qulay sharoit yaratildi.

Bu yerga qurilish materiallari, yengil sanoat, oziq-ovqat tarmoqlarida 15 loyiha joylashtirilgan, shundan 10 ta ishga tushirilgan. Ularda oʻtgan yili 295 milliard soʻmlik import oʻrnini bosuvchi mahsulotlar ishlab chiqarilgan. Joriy yil yakunlari boʻyicha bu raqamni qariyb ikki baravarga koʻpaytirish maqsad qilingan. Hozircha bu korxonalarda 1 500 dan ortiq kishi mehnat qilmoqda. Barcha loyihalar ishga tushsa, bandlik yana ortadi.

“Enter Steel” korxonasida metall konstruktsiyalar, yuqori bosimga chidamli rezervuarlar, yuk koʻtaruvchi kranlar, burgʻulash uskunalari, payvandlash elektrodlari, metall eshik, elektr qutilar ishlab chiqarish yoʻlga qoʻyilgan.


Ushbu loyihaning qiymati 40 mln dollar boʻlib, unga toʻgʻridan-toʻgʻri xorijiy investitsiyalar yoʻnaltirilgan. Bu yerga Xitoy, Yaponiya, Rossiya, Turkiya, Italiya, Ispaniya, Germaniya va Niderlandiya kabi davlatlardan uskunalar keltirilgan. Bu esa mahsulotlar sifati va ish unumdorligi yuqori boʻlishiga xizmat qilmoqda.

Prezident korxonaning ish jarayonini koʻzdan kechirdi, bu yerda tayyorlanayotgan mahsulotlar koʻrgazmasi bilan tanishdi. Mutasaddilarga korxona mahsulotlari zarur boʻlgan tarmoqlar bilan kooperatsiyani rivojlantirish boʻyicha koʻrsatmalar berildi.

Prezident “Tinchlik” KSZga tashrifida quyosh panellari va turli kabellar ishlab chiqarayotgan “Enter Green Solar” korxonasi faoliyati bilan ham tanishdi.

“Bunday yuqori texnologik mahsulotlar ishlab chiqarayotgan mahalliy korxonalarimizni qoʻllab-quvvatlab, faoliyatini kengaytirishiga yanada koʻproq sharoit yaratishimiz kerak", – dedi Shavkat Mirziyoev.

Umumiy qiymati 7 mln dollar boʻlgan mazkur korxonaga Italiyaning “Ecoprogetti” kompaniyasi uskunalari oʻrnatilgan. Ular asosida yiliga 377 ming dona yuqori sifatli quyosh paneli ishlab chiqarish yoʻlga qoʻyilgan. Korxonaning oʻzida ham quvvati 125 kilovatt boʻlgan panellar qoʻyilgan. Bu yerda 100 kishi mehnat qilmoqda.

Yangiyoʻl tumanidagi loyihalardan yana biri – “Mesal Water Technologies” boʻlib, bu korxona suv tozalash inshootlari uchun 30 dan ortiq maxsus qurilma va uskunalar ishlab chiqarmoqda.

Loyihaga 1,7 mln dollar mablagʻ yoʻnaltirilib, Xitoy, Germaniya va Turkiyadan keltirilgan energiya tejamkor texnologiyalar oʻrnatilgan. Korxona xalqaro sertifikatlarga ega. 50 kishi ish bilan ta'minlangan.

Bunday korxonalar faoliyatining kengayishi aholi farovonligi va salomatligiga hissa qoʻshishi ta'kidlandi.

Prezident Toshkent viloyatida amalga oshirilishi rejalashtirilayotgan investitsiya loyihalari taqdimoti bilan tanishdi, investorlar bilan suhbatlashdi. Ma'lum qilinishicha, Xitoy investorlari bilan hamkorlikda Olmaliq shahrida “Buyuk ipak yoʻli” industrial texnoparki tashkil etiladi. U yerda elektrotexnika, toʻqimachilik, qurilish materiallari, farmatsevtika kabi yoʻnalishlarda 100 ga yaqin korxona joylashtiriladi. 3 mingta yangi ish oʻrni yaratilib, yiliga 5 trillion soʻmlik mahsulot ishlab chiqariladi.

Zangiota tumanida esa Janubiy Koreya investorlari bilan birgalikda jigar, boʻgʻim, koʻz va miya faoliyatini davolashda qoʻllaniladigan dori vositalari ishlab chiqarish tashkil etiladi. U yerda 200 kishining bandligi ta'minlanadi.

Shavkat Mirziyoev investorlar uchun barcha sharoitlarni yaratish, loyihalarning har bir bosqichini nazorat qilib, masalalarini hal etish boʻyicha koʻrsatmalar berdi. “Zamin” yangiliklarini “Telegram”da kuzatib boring