Minsk shahrida o‘tayotgan MDH Hukumat rahbarlari kengashi yig‘ilishida Rossiya bosh vaziri Mixail Mishustin so‘nggi to‘rt yilda Hamdo‘stlik davlatlari o‘rtasidagi o‘zaro savdo hajmi 18 foizga ko‘tarilganini ma’lum qildi. Uning ta’kidlashicha, bu natija MDH iqtisodiy rivojlanish strategiyasi amalga oshirilayotganining samarasi hisoblanadi.
Mishustinga ko‘ra, yalpi ichki mahsulot ko‘rsatkichi ham o‘sish tendensiyasini namoyon qilmoqda. Navbatdagi muhim qadam esa xizmatlar sohasida erkin savdo shartnomasining kuchga kirishi bo‘ladi. Bu kelishuv mamlakatlar o‘rtasidagi iqtisodiy aloqalarni yanada mustahkamlashga xizmat qilishi kutilmoqda.
MDH Bosh kotibi Sergey Lebedev esa kengash kun tartibida 14 ta masala va 25 ta hujjat loyihasi ko‘rib chiqilayotganini ma’lum qildi. Mazkur hujjatlar Hamdo‘stlik davlatlari hamkorligini turli sohalarda yanada kengaytirishga qaratilgan.
Shu tariqa, Minskdagi yig‘ilish MDH mamlakatlari uchun iqtisodiy integratsiya jarayonlarini yangi bosqichga olib chiqishi mumkinligi ta’kidlanmoqda.
“Zamin”ni Telegramʻda oʻqing!
