Markaziy bank e’lon qilgan yangi ko‘rsatkichlarga ko‘ra, O‘zbekistonning oltin-valyuta zaxiralari 2025-yil 1-dekabr holatida 61,23 milliard dollarga yetdi. Bu mamlakat uchun so‘nggi o‘n yillikdagi — aniqrog‘i, 2013-yildan buyongi eng yuqori natija sifatida qayd etilmoqda.
Noyabr oyida zaxiralar yana 1,9 milliard dollarga ko‘tarilgan, yil boshidan beri esa o‘sish qariyb 20 milliard dollarni tashkil etdi. Mutaxassislar bu o‘sishning asosiy omili sifatida jahon bozoridagi oltin narxining o‘sishi va mamlakat zaxiralaridagi fizik oltin miqdorining ortishiga ishora qilmoqda.
Oltin hajmi va qiymati bo‘yicha rekord
Oltinning fizik zaxirasi ham ketma-ket ikkinchi oyda o‘sish qayd etdi. Noyabrda miqdor 310 ming troya unsiyaga (ya’ni 9,64 tonna) oshib, umumiy xajm 12,23 million unsiyaga (380,4 tonna) yetdi. Shunga qaramay, yil boshidan buyon umumiy hajm bo‘yicha ozgina, taxminan 2,1 tonnalar atrofida kamayish kuzatilgan.
Biroq eng e’tiborli jihat — oltin zaxiralarining qiymati 3 milliard dollarga oshib, tarixiy maksimum bo‘lgan 50,86 milliard dollarga chiqdi.
Valyuta va qimmatli qog‘ozlar qismlari
Zaxiralarning valyuta qismi biroz pasayib, 1,1 milliard dollarga kamaygan holda — 9,8 milliard dollarni tashkil etdi.
Qimmatli qog‘ozlar hajmi avvalgi oyga nisbatan 503,3 million dollarga ko‘payib, umumiy hajm 1,53 milliard dollarga yetdi.
Oltin eksportida ham rekord natija
Avvalroq, 2025-yil 1-noyabrda O‘zbekiston zaxiralari qiymati ilk bor 59,3 milliard dollardan oshib, tarixiy bosqichni belgilagandi. Shuningdek, mamlakat oltin eksporti bo‘yicha ham rekordni yangiladi: yanvar—sentyabr oylarida 9,9 milliard dollarlik oltin sotilgan. Bu o‘tgan yilning shu davriga nisbatan qariyb 71 foizga ko‘p bo‘lib, mamlakat tarixida yillik hisobda ham bunday ko‘rsatkich kuzatilmagan.
O‘zbekiston zaxiralarining bu tarzda oshib borishi iqtisodiy barqarorlik, tashqi qarzlarga nisbatan mustahkamlik va moliyaviy xavfsizlikka xizmat qiluvchi muhim omil sifatida qayd etilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
