Janubiy Koreyaning eng yirik moliya tashkiloti KB Financial Group Kaia blokcheyni yordamida oflayn toʻlovlar va transchegaraviy pul oʻtkazmalari uchun steyblkoin sinovini muvaffaqiyatli yakunladi. Yonhap agentligining xabar berishicha, sinov jarayonida Janubiy Koreya voniga bogʻlangan raqamli aktivning emissiyasi, savdo nuqtalarida hisob-kitob qilish va xalqaro pul oʻtkazmalari kabi bosqichlar amalga oshirilgan. Bu haqda Cointelegraph.com xabar beradi.
Tajriba doirasida von steyblkoinlari AQSh dollari steyblkoinlariga konvertatsiya qilinib, Vetnamdagi bank hisob raqamiga yuborilgan. Kaia vakillarining taʼkidlashicha, ushbu operatsiya 3 daqiqadan kamroq vaqt ichida yakunlangan va SWIFT tarmogʻi orqali amalga oshiriladigan anʼanaviy oʻtkazmalarga nisbatan komissiya toʻlovlari 87 foizga arzonlashgan.
Oflayn toʻlovlar sinovi Seuldagi Hollys qahvaxonalar tarmogʻi orqali oʻtkazildi. Mijozlar kripto-hamyon oʻrnatmasdan, QR-kod yordamida toʻlovlarni amalga oshirish imkoniga ega boʻldilar. Bu Janubiy Koreyadagi yirik moliya institutlarining raqamli aktivlar sohasidagi qiziqishi ortib borayotganini koʻrsatadi.
Hozirda KB Financial mamlakatda raqamli aktivlar boʻyicha qonunchilik bazasi toʻliq shakllangach, steyblkoin xizmatlarini keng koʻlamda joriy etishga tayyorgarlik koʻrmoqda. Biroq, Janubiy Koreya Markaziy banki va Moliya xizmatlari komissiyasi oʻrtasida steyblkoin emitentlariga qoʻyiladigan talablar boʻyicha kelishmovchiliklar saqlanib qolmoqda.
“Zamin”ni Telegramʻda oʻqing!
