Bernstein Research hisobotiga koʻra, tokenizatsiya qilingan real aktivlar (RWA) bozori joriy yilda 42 foizga oʻsib, 51 milliard dollarni tashkil etdi. Ushbu oʻsishning asosiy drayveri xususiy kreditlash segmenti boʻlib, u umumiy RWA qiymatining qariyb 44 foizini egalladi. Bu holat kreditlash va jamgʻarma tuzilmalarida blokcheyn infratuzilmasidan foydalanish koʻlami kengayib borayotganini koʻrsatmoqda. Bu haqda Cointelegraph.com xabar beradi.
Bozordagi 51 milliard dollarlik baholash boshqa tahliliy markazlar, xususan, RWA.xyz tomonidan berilgan 34 milliard dollarlik koʻrsatkichdan sezilarli darajada yuqori. Bu tahlilchilarning tokenizatsiya qilingan aktivlarni hisoblashda turlicha yondashuvlardan foydalanayotganini anglatadi. BlackRock kompaniyasining aktivlari 2,5 milliard dollardan oshgan BUIDL jamgʻarmasi kabi yirik loyihalar institutsional investorlarning ushbu sohaga qiziqishi ortayotganidan dalolat beradi.
Tokenizatsiya qilingan xususiy kreditlash anʼanaviy bank tizimidan tashqarida, kreditlarni toʻgʻridan-toʻgʻri blokcheyn tarmoqlarida qayd etish imkonini beradi. Bernstein maʼlumotlariga koʻra, bu yoʻnalishdagi oʻsishning katta qismi Figure Technology Solutions (FIGR) kompaniyasi hissasiga toʻgʻri keladi. Kompaniya 18 milliard dollarlik aktivlari bilan RWA platformalari orasida yetakchilik qilmoqda. Undan keyingi oʻrinlarni har biri 4,2 milliard dollarlik aktivlarga ega Securitize va Paxos egallagan.
Mutaxassislarning fikricha, xususiy kreditlash RWA sohasidagi eng tez rivojlanayotgan tarmoqlardan biriga aylanmoqda. Bu tizim investorlar uchun yuqori daromadlilikni, biznes uchun esa zarur kapitalni taʼminlaydi. Garchi AQSH gʻaznachilik obligatsiyalari (Treasurys) tokenizatsiyasi birinchi muvaffaqiyatli qadam boʻlgan boʻlsa-da, xususiy kreditlar real iqtisodiyot bilan bevosita bogʻliqligi sababli jozibadorroq hisoblanadi.
“Zamin”ni Telegramʻda oʻqing!
