Endi chet elda ishlovchi migrantlarga ham soliq solinadimi?

^{Foto:«Gazeta.ru»}
Ijtimoiy tarmoq va ayrim OAVlarda chet elda ishlovchi muhojirlar ham soliqqa tortilishi mumkinligi bo‘yicha xabarlar tarqaldi. Davlat soliq qo‘mitasi shu masala yuzasidan tushuntirish berdi.

«Prezidentimizning PQ-4829-sonli qaroriga muvofiq 2021 yil 1 yanvardan boshlab xorijda mehnat faoliyatini amalga oshirayotganlar o‘zini o‘zi band qilgan shaxslarga tenglashtirilgani sababli, internet tarmoqlarida mehnat muhojirlari uchun soliq joriy etilayotganligi to‘g‘risida noto‘g‘ri ma’lumotlar tarqalmoqda.

Soliq kodeksining 369-moddasiga muvofiq o‘zini o‘zi band qilgan shaxslar jismoniy shaxslardan olinadigan daromad solig‘idan ozod etiladi.

O‘zini o‘zi band qilgan shaxslar o‘ziga pensiya hisoblanishi va ish stajiga ega bo‘lishi uchun Pensiya jamg‘armasiga ixtiyoriy ravishda ijtimoiy soliq to‘lashi mumkin, bu 2020 yil uchun eng kamida BHMning 50 foizi miqdorida belgilangan, hozirgi vaqtda 111 500 so‘mni tashkil etadi» - deyiladi bayonotda.

Shu bilan birga, agar chet elda vaqtinchalik mehnat faoliyatini amalga oshirayotgan fuqarolar O‘zbekistonda pensiya va ish stajiga ehtiyoj sezmasa, unda Pensiya jamg‘armasiga ijtimoiy soliq to‘lashning hojati yo‘q. “Zamin”ni Telegramʻda oʻqing!